KASONG murder ang giatubang karon sa usa ka tawo kinsa mipusil patay sa usa ka sa security guard didto sa Tahimik Drive ug Torres Street, Bo. Obrero, siyudad sa Davao niadtong Hulyo 23.

Si Rakib Sampato gidemanda sa kapulisan human nasuta nga siya ang mipusil patay kang George Abarca, 51, security guard sa Opscor Agency Inc. ug nagpuyo sa No. 26, 6th Avenue, Bangoy, ning siyudad.

Ang kaso nakadoket sa IS # XI-02-INV-10-G-01892 sa City Prosecution Office (CPO), Hall of Justice, Ecoland, ning siyudad.

Sa progress report sa Sta. Ana Police Station, si Sampato maoy gitudlo sa mga nakasaksi sa insidente nga maoy mipusil sa biktima sa alas 10:00 sa gabii, adlaw'ng Biyernes.

Si Abarca giingon nga nagbantay sa iyang 'post' sa balay sa pamilyang Ang didto sa Tahimik Drive ug Torres Street apan giduol siya sa suspetsado.

Giingon nga way daghang pangutana ang suseptsado, iyang gipusil ang biktima tumong sa dughan nga miresulta sa iyang kamatayon.

Gipaabot sa kapulisan nga moguwa ang warrant of arrest aron sikopon ang suspetsado ug taralon ngadto sa korte tungod sa salang pagpatay. (Alger Dura)