Krimen sa siyudad mokunhod

ANG Public Safety Command Center (PSCC) nga giinagurahan sa lokal nga kagamhanan niadtong Miyerkules, dako ang ikatabang sa kapulisan sa pagsumpo sa mga kriminal sa nagkadaiyang kadalanan sa dakbayan sa Davao.

Kini ang pamahayag ni Davao City Police Office (DCPO) director Senior Supt. Rene Aspera bahin sa usa ka multi-million project nga PSCC.

Giinagurahan mao ang two-storey building diin gibutang ang mga monitor sa closed-circuit television (CCTV) cameras nga gimuntar sa tanang dapit sa siyudad ug ang maong building maoy istasyon sa traffic signalization program sa siyudad.

Ang PSCC, nahimutang kilid sa Central 911 didto sa SIR New Matina, gitakdang motabang sab sa ubang mga opisina ug departamento (lokal ug nasyunal) bahin sa public safety.

"Nakakatulong ito sa amin sa pagresponde sa lahat ng criminalities happened in major thoroughfares of the city," pahayag ni Aspera.

Ang PSCC nga proyekto maoy gasa ni kanhi Mayor ug karon Vice Mayor Rodrigo Duterte sa katawhang Dabawenyo isip kabahin sa iyang peace and order program apan nahuman kini sa panahon na sa iyang anak nga si Mayor Sara Duterte.

Ang amahang Duterte maoy nangulo sa pagtukod sa traffic control center ug pagmuntar og CCTV cameras sa siyudad.

Ang budget alang sa maong center ug mga ekipo kabahin Phase 3 sa traffic signalization program, nga nagkantidad og P704-million.

"Damgo ni sa mga taga-Dabaw, dili ako. Mao na ang gisugo sa imo mao nang naa kay dapat ihatag. Para ni sa tao," pahayag ni Duterte sa miaging pakighinabi kaniya sa mga sakop sa media.

Sa katukoran sa PSCC, suma sa kapulisan, sayon lang unya nila ang paggukod sa mga kriminal nga posibleng mohimo og kagubot dinhi sa siyudad. (Alger Dura)