USA ka dakong binoang ug hinanggaw kining balaudnon, House Bill 6330, ni Kabataan Partylist Rep. Raymond Palatino nga magdili sa mga relihiyusong kalihukan ug pag-display og mga imahen o rebulto sa mga santos sulod sa mga government buildings ug offices. Kay matod pa ni Kong. Palatino nga ang iyang sugyot balaudnon maghatag og kagawasan sa katawhan sa ilang mga tinuhuan.
Kon simbako languyon pito ka lawod, idili na ang pagpahigayon og misa o bisan unsang mga rehilyosong kalihukan sa mga government offices sama diha sa City ug Capitol. Kon adunay okasyon sama sa Charter Day o founding anniversary, wala nay misa. Unya ipatangtang na kanang mga imahin sa mga santos o rebulto ni Senior Sto. Nino. Na, gibaliw na. Wa nay mga religious activities o ba kaha misa atol sa Sinulog diha sa Cebu City Sports Complex kay government building man na.
DILI MOTUO OG GINOO
Wala ako masuhito sa background aning Kong. Palatino. Dili siguro ni motuo og Ginoo. O ba kaha dili ni siya Romano Katoliko. Ang akong nahibaw-an nga kining Kabataan partylist usa kini ka radikal nga partylist nga gimugna sa mga militante ug radikal nga gropo sa mga tinun-an. Unya estudyante kini siya sa University of the Philippines (UP) Diliman kaniadto. Aw, may pagka-kumunista.
Nganong mao man kini ang misulod sa iyang utok? Wala na siyay lain mahimo nga balaudnon nga makatabang sa sektor nga iyang gi-representahan. Unsay religious freedom nga kining gihimo makabuak-buak man hinuon kini. Nganong pugngan man nimo ang usa ka tawo o grupo sa mga tawo nga mopadayag sa ilang tinuhuan sa usa ak publikong lugar?
Ngano man diay og naay rebulto o santos sa ilang opisina? Manghilabot ba nang rebulto?
SUPAKON
Maayo man gani butangan og rebulto kanang mga opisina aron magpanagana ang naa diha nga mohimo og binoang sa ilang katungdanan. Butangan nag dakong rebulto ang opisina sa Bureau of Customs, Public Works, PNP ug uban pa nga kusog ang kurapsiyon. Mas maayo nang naay kahadok sa Ginuo ang mga opisyal gumikan sa ilang tinuhuan kay sa wala.
Gusto ba aning Kong. Palatino nga bisan diha sa Kongreso did-an na sila nga mopahigayon og misa o religious rituals/gatherings kon adunay mga okasyon?
Mas maayo siguro nga ipakita nato ang atong pagsupak ning maong balaudnon.
(bobby.nalzaro@yahoo.com)