SA nanganging mga adlaw, giduso ni Cebu City Mayor Mike Rama ang pagpamalit og musical instruments aron gamiton sa showband ug chorale nga pagapormahon sa Siyudad.
Matod niya nga mas maayo ni aron maka-relax sab ang mga kawani sa City Hall gikan sa kapoy kaayong trabaho.
Human ini, nia na sab ning plano kuno sa pagpalit og eroplano.
Tuyo ini mao ang paggamit sa abyon sa mga aerial survey kon dunay mga trahedya o katalagman sa kabukiran ug kadagatan.
Bisan tuod kon ang iduso nga paagi sa pagbayad sa Siyudad sa ahensya nga mobaligya sa abyon nga gisubasta mao ang pagtukod og mga tunghaan, di gihapon makalusot sa galastuhan ang kagamhanan.
Gawas sa pagsuweldo og lisensyadong piloto nga makapalupad niini, ang maintenance sa abyon dako sab og kaon sa budget.
Kay kini nga mga abyon 40 ka tuig na kapin ang edad, grabe ang galastuhan sa maintenance niini aron magpabiling airworthy o kapabilidad sa paglupad nga luwas alang sa mga nagsakay.
Daan na sab nga mipahimangno ang Dept. of Education (DepEd) nga ang mga piyesa sa abyon di sayon pangitaon. Sa ato pa, nihit ug mahal sab kini kaayo.
Gawas niini, ang storage sa abyon di sab libre. Mogasto gyud ang City Hall kay maayo mag dunay katugpahan diha sa ilang building aron di na mogasto.
Sus, kadaghan ra ba sa problema sa Siyudad nga mas nagkinahanglan og dinaliang pagtagad. Nganong ang pagtukod man gyud og banda ug pagpalit og abyon ang unahon?
Mao ba ni ang sulbad sa mga problema sa si-yudad sama sa basura, nabarang estiro, gubaong mga karsada ug nagkagubot nga sidewalk?