NAHABWA ang utok sa drayber sa itom nga Pajero human nabangga sa poste sa billboard nga nahimutang sa center island sa tiilan sa Marcelo Fernan Bridge habig sa dakbayan sa Mandaue kagahapon sa hapon.

Usa sa iyang mga pasahero namatay usab human malabay gikan sa sakyanan tungod sa kakusog sa impact.

Updates on President Benigno Aquino III's presidency

Ang maong sakyanan gipaubos sa road test sanglit bag-uhay pa lang kini napalit sa tag-iya.

Gani gikan pa sa autoshop sa Basak, dakbayan sa Lapu-Lapu ang 4x4 ug three-door Pajero aron pagsusi sa makina niini.

Ang drayber nga namatay giila nga sil Emerciano Babao, 36, mekaniko ug tag-iya sa auto shop.

Samtang ang laing namatay giila lang sa ngalan nga Rolly, helper mechanic nga taga-barangay Labangon, dakbayan sa Sugbo.

Si Rolly naglingkod sa luyo nga bahin sa sakyanan nga nalabay.

Ang lawas ni Rolly diha na nagbuy-od sa karsada sanglit trapal ra ang atop sa maong sakyanan ingon man ang kilid nga bahin niini.

Duha ka mga pasahero ang nangaangol ug dali nga gidala sa Mandaue City Hospital giila nga sila si Michael Ibarzabal, 30, mekaniko ug si Agapito Amores, 56, tag-iya sa Pajero, taga-barangay Marigondon, Lapu-Lapu City.

Nagduda ang traffic investigator sa Mandaue City Police Office (MCPO) nga kusog ang padagan sa maong Pajero nga nagdala sa plate number CMY-388.

Gituohang moabot sa 120 kilometros matag oras ang gikusgon sa dagan niini.

Giingong unang nibangga sa poste sa billboard sa center island sa tiilan sa taytayan ang sakyanan dayon nilahos na ngadto sa punoan sa Talisay sa barangay Umapad, dakbayan sa Mandaue.

Giduaw sa mga imbestigador sa Traffic Division ang auto shop ni Babao.

Nasayran nga nag-inom og duha ka case sa ilimnong makahubog sila si Amores, Babao ug Rolly sa wa pa ang hitabo.

Nasayran nga si Amores maoy nigasto sa ilimnon nga ingon sa nag-celebrate human nakapalit sa maong sakyanan ug pahalipay sa mga mekaniko nga nitrabaho sa iyang Pajero.

Padayon nga gitino sa mga imbestigador ang hinungdan sa aksidente kon resulta ba sa kahubog sa drayber o kon nawad-an sa brake nga niresulta sa pagkabangga sa Pajero.