HUMAN sa pasalig ni Presidenti Benigno Aquino III nga hatagan og tubag ang mga pangutana sa mga anomaliya aron maangkon na sa hingpit sa atong katawhan ang gimithi nga hustisya ning iyang administrasyun pinaagi sa iyang “Truth Commission”, kansang obligasyon iyang gisangon sa Sugbuanong retiradong si Chief Justice Hilario Davide Jr.

 

Ang mga alipores ni Congresswoman Gloria Macapagal Arroyo sa Kongreso ang dali kaayong nakapanghinaway ning maong gitanyag nga solusyon. Si Senador Joker Arroyo ang mihimo og pagpanag-an nga walay mahimo ang komisyon kay kini usa ka tigre nga wala’y ngipun kay dili man kini makapugos sa mga respondente sa pagpatubag kay wala man kini gahum sa pag subpoena ug dili usab makapahamtang og silot kay wala man kini power of contempt.

Updates on President Benigno Aquino III's presidency

Si Minority Floor Leader Congressman Edcel Lagman dali usab kaayong nakabiay-biay kang Noynoy nga hangtud karon wala pa gyud niini mapagawas ang Executive Order alang sa katukuran sa Truth Commission kay ang kamatuuran mao nga dili iya sa Opisina sa Presidenti, kon dili ilang trabaho sa Kongreso ang pagmugna og mga ahensya, buhatan og komisyon sa bisan unsang katuyuan dungan na usab ang pagbutang og gahin alang niini.

Maoy ilang gipabarog nga wala kinahanglana pa ang Truth Commission kay kini duplikasyun sa trabaho nga daan nang gisangon sa buhatan sa Ombudsman ug sa Departamento sa Hustisya. Gawas pa og imbestigasyon ang gikinahanglan aron mapugngan na ang pagsubli sa mga nanglabayang mga kasaypanan, anaa man sila sa Kongreso nga adunay mandato sa Konstitusyon sa paghimo og “investigation in aid of legislation”.

Apan kining matanga sa argumento magdala lang sa nasud sa walay katapusang pagtuyok-tuyok nga walay esperanza nga makab-ot ang kasulbaran kay sayud man ang tanan nga wala kita’y mapaabot sa buhatan sa Ombudsman. Kun mao usay ilang ipanghambog ang mga imbestigasyon nila sa Kongreso, ang bugtong resulta ra gyud nga nakita sa mga Pilipino mao ang pasikat sa mga politiko apan wa gyuy mga sad-an ang nasilutan og wala usa’y mga balaud ang napasar nga sarang atong kapuslan.

Ang paghatag usab sa Kongreso sa katungdanan sa pag-umol sa Truth Commision ang susama da sa pagkaon sa katawhan sa putahing lutong bugaw. Kay bisan pa man og gidominahan na karun sa Partidong Liberal ang Kamara de Representante, apan ang gipilian alang sa Speakership kon dili kanhi taga Lakas nga si Sonny Belmonte,  ang nagpabilin raman usab gihapon sa Lakas nga padigo-padunot nga si Edcel Lagman. Hinungdan nga kun dili man ugani pagkatikoy ang dangatan, mamuti nalang usab unya ang kalimutaw sa katawhan sa pagpinaabot sa komisyung wala nay tsansang moabot kay walay miyembro sa kahugpungan sa “bright boys and girls club” ang mosugot nga unayon sila’g gisal sa ilang kaugalingong mantika.

Kining maong kapakyasan maoy gustong mahitabo sa mga bugaw nga way laing tumong gawas lamang sa pagseguro sa ilang kaugalingong kaluwasan og katagbawan. Ang mga pagbabag og pagasaway pag-umol sa Truth Commision mga timaan lamang sa gibating kalisang sa mga tawong nahadlok moatubang sa nagkaduol nga panudya.