Christopher N. Jome
Tajao, Pinamungajan, Cebu
Hinaot nga ako inyong mapasaylo
Niining akong panginabuhing negusyo.
Dili kini shabu apan makadaot sa tawo,
Dili kini mahal mapalit rag peso.
Uwan ug init sa dalan antuson ko
Makakaon lang ko sa adlaw katulo.
Bisan nagkapagaw isinggit ko,
Sigarilyo na kamo mga amigo!
Negusyo nako dili ko mapasmo,
Bisan sa mga bata halin kaayo.
Ang kita nako nga pulos sinsilyo
May pakapin nga papel de banko.
Ang adlaw nako debuynas kaayo.
Ang halin usahay moabot og usa ka libo.
Sigarilyo nga akong negusyo
Walay pagkalugi ug segurado.
Busa karon kamo akong gihaylo.
Mga dautang buhat likayi ninyo.
Pagkat-on sa kinabuhing limpyo
Sa dalan paninda og sigarilyo.
Dunay tambag kining tindero,
Hinayhinay lang sa sigarilyo.
Ayaw kalimti nga kini dili maayo
Kay sa inyong lawas hudas kaayo!