PATAY ang usa ka 67-anyos nga lalakeng nagbisiklita dihang nilabang kini sa Cebu South Coastal Road sa Barangay San Isidro, Talisay City alas 9:50 kagahapon sa buntag ug nadasmagan sa naghaguros nga tractor trailer.

Ang biktima nga si Arturo Agero, minyo, taga Corazon Village, San Isidro gidala sa Vicente Sotto Memorial Medical Center apan gidiklarar sa mga doctor nga dead on arrival.

Updates on President Benigno Aquino III's presidency

Ang imbistigador sa traffic division nga si SPO2 Ricky Larrobis nibutyag nga sakay sa iyang bisiklita si Agero dihang nadasmagan sa Nissan tractor trailer (GVN 516) nga gimaneho niTeodoro Pangan, 59, nga taga Jumalon St., Reclamation Area, Cebu City.

Ang trailer nga iya sa Van Transport Incorporated paingon sa south dihang nahitabo ang aksidente.

Atol sa imbistigasyon nasuta nga nilabang ang biktima bisan og go pa ang signal pabor sa trailer.

Si Pangan nibutyag nga gisuwayan pa niya sa pag brake ang iyang sakyanan apan naigo na ang biktima ug naguroy sa ilawom. Ang lawas sa biktima nalatayan sa usa sa mga ligid sa sakyanan ug giingong nagupok sab ang mga bukog sa tiil.

Gidala ang biktima sa mga sakop sa Agero Talisay Rescue Emergency Action Team (TREAT) sa tambalanan sa Cebu City apan wa na gyud maluwas. Gitanggong dayon ang driver sa detention cell ug gitakdang pasakaan karong adlawa og kasong reckless imprudence resulting in homicide. (VLM)