NABALI-BALI ang kabukogan sa usa ka driver nga namatay human ang iyang truck nga gikargahan og ginabas nga mga lubi ang nahagbong sa 40 ka tiil nga giladmon sa pangpang kagahapon sa sayo sa buntag sa Brgy. Anislag, lungsod sa Pinamungajan, Sugbo.

Nipilit sa front seat ang biktimang si Andres Tanutan Silva, 26, minyo, nagpuyo sa maong barangay. Nagusbat ang iyang truck nga Isuzu (GKB-736) dihang nitugpa sa batoon nga lugar.

Updates on President Benigno Aquino III's presidency

Si PO1 Roylan Velasquez, desk officer sa Pinamungajan Police Station nga nahinabi sa Sun. Star Superbalita, niingon nga mga alas 6 sa buntag kagahapon, ang biktima uban sa iyang ig-agaw ug laing duha pa ka mga helper mag-deliver unta sa mga lumber nga lubi ngadto sa lungsod sa San Fernando.

Matod niya nga puno ang trak sa mga lumber apan ang sakyanan way starter hinungdan nga gikinahanglan pa kining itulod aron moandar.

Sumala pa niya nga ang ig-agaw sa biktima nga helper usab nga si Steven Tanutan, 26, ulitawo, ingon man sila si Mando Cabardo ug Mario Laraño, nagtinabangay sa pagtulod sa truck paingon sa dulhugon nga lugar dayong sakay nila.

Apan si Steven, kinsa diha sa luyo ni Silva, nakabantay nga samtang nagdulhog wa moandar ang sakyanan ug wa na usab makaliko samtang nagpaingon sa pangdang mao nga dali siyang niambak agi sa bintana ug nanunod ang iyang duha ka mga kauban sa luyo.

Matod niya nga maayong pagkahayang sa trak didto sa ubos ug nagusbat ang atubangang bahin.

Si Silva didto sa sulod na trap ug nabalian sa kabukogan sa dughan ug ubang parte sa lawas ang biktima.

“Buhi pa siya pero naglisod man og kuha ang among mga kaubana ug mga residenti sa dapit. Naabtan pag-alas 9 sa buntag una pa nabunlot hinungdan nga wala na gayud madala pa sa hospital,” sumala pa ni PO1 Velasquez.

Gipadayag niya nga ang manobela sa trak di usab malubag kon dili makaandar ang makina niini hinungdan nga sa ka kalit sa hitabo wa na makaambak si Silva.

Igo ra kining nakasulti nga mangadto na sila dayong kahagbong sa pangdang.

Samtang giklaro ni Velasquez nga di usab hubog ang biktima atol sa iyang pagmaniho sa sakyanan.

Nalangay ang mga rescuer sa pag-ugkat sa biktima gumikan sa kalisod sa area diin lawom kaayo ang pangpang.

Gani nagpatabang silang mga pulis sa local nga kagamhanan sa Pinamungajan aron maugkat ang sakyanan sanglit di kini madalag bira kon way dagkong mga ekipo. (Guam P. Logroño)