HAPIT na maputol ang liog sa usa ka manindahay og puto nga usa usab ka tambalan ug lay minister sa ilang dapit human tigbasa sa wa mailhing mamumuno samtang siya naglakaw nga nagpas-an sa iyang tindang poto niadtong Huwebes sa buntag sa Sityo Tipolo, Brgy. Bato, dakbayan sa Toledo.

Ang biktima giila nga si Rico Lopez, 55, biyudo, taga Purok 2, Brgy. Talavera sa nahisgutang lugar nakaangkon og duha ka mga samad tinigbasan sa walang bahin sa liog.

Updates on President Benigno Aquino III's presidency

Si SPO1 Jerry Trinidad imbestigador sa kapulisan sa dakbayan sa Toledo nga nahinabi sa Sun.Star Superbalita nagkanayon nga niadtong Huwebes sa sayo sa buntag sayong nibiya ang biktima sa ilang balay aron pagpamaligya og puto.

Apan mga alas 8:30 sa maong adlaw, nakit-an na lang sa usa ka mag-uuma nga si Felix Cabatuan nga naglunang sa dugo sa usa ka hilit nga dapit nga dunay tanom nga mga mais sa Sitio Tipolo, Brgy. Bato sa mao nga siyudad.

Si Trinidad niingon nga wa pa gayud silay suspek nga matumbok sanglit way bisan usa ka saksi nga nakakita sa krimin.

Dunay usa ka balay sa dapit apan layo ra sab sa crime scene.

Di pa sila makatumbok kon tulis ba ang motibo sa krimin gumikan kay ang pitaka sa biktima diha pa sa possession niini nga dunay cash nga P70.

Apan naglibog sila gumikan kay nahanaw usab ang duha ka baldi sa biktima nga maoy gisudlan sa iyang baligya nga puto ug wa na gyud makit-i pa.

Ang tulis kabahin sa ilang imbestigasyon, apan gisubay usab nila ang motibo nga posibling dunay nasuko sa biktima.

Apan sa ilang pagduaw sa balay sa biktima, ang mga anak niini nitug-an nga way kontra ang ilang amahan ug maayo kining tawo.

Naila kining usa ka tambalan sa ilang lugar ug daghan ang nangaayo apan duna say wa.

Gawas sa iyang pagka-mananbal aktibo usab kini isip usa ka lay minister sa ilang dapit.

Wa hinuon nila isalikway ang posibilidad nga di usa ka tawo ang naghimo sa maong krimin.

Sa samang panghitabo alas 8:30 niadtong Huwebes sa gabii, usa Benedicto Alquino, 32, minyo, taga Sitio Paril, Brgy. Talavera gitigbas sa makadaghang mga higayon sa iyang silingan nga si Pablito Soccoro.

Sa imbestigasyon sa kapulisan sa Toledo, ang biktima kuyog nga nag-inom sa suspek apan sa panaglami na sa ilang inom niabot sa punto nga nagkalalis ang duha nga ni-resulta

sa pagpanigbas.

Ang biktima gidala sa pagdala sa tambalanan samtang ang suspek nakaeskapo.