USA ka lalaki nadala sa ospital human naunay sa iyang pusil sulod sa iyang panimalay didto sa Purok Madasigon, Barangay Cuambog, lungsod sa Mabini, Comval Province, Miyerkules sa hapon.
Nailhan ang biktima nga mao si Juan Maguindanao, 37, ug molupyo sa maong dapit.
Sa report gikan sa Comval Province Police Provincial Office, nasayran nga pasado ala 1:30 sa hapon, hubog ang biktima samtang nagdula-dula sa usa ka homemade kalibre 5.56 nga pistola didto mismo sulod sa iyang balay. Apan aksidente niyang nakablit ang gatilyo sa pistola hinungdan nga mibuto. Naigo si Maguindanao sa iyang ulo.
Daling gidala sa Davao Regional Hospital sa siyudad sa Tagum ang biktima aron matambalan.
Hinuon pagkahapon, nakagawas na sab sa ospital ang biktima sanglit dili grabe ang samad nga iyang nahiaguman.
Nasuta nga ang pusil nga gidulaan sa biktima gipanag-iyahan sa usa ka Elmer Paulinio, usa ka sakop sa Citizen Armed Forces Geographical Unit ilawom sa 72nd Infantry Battalion.
Kapulisan sa lungsod sa Mabini mihimo na karon og dugang imbestigasyon sa nahisgutang hitabo. (Marvin Pineda)ARVIN PINEDA