NAPUGOS lang ang Davao del Sur Provincial Police Office (DDSPPO) sa pagpanakop sa illegal nga sugal nga Last 2 sigon sa pagpaniid sa mga nagpakabanang lumolupyo sa lalawigan.

Tulo ka mga wa magpailang usher kinsa unang nasikop sa gihimong ronda sa kapulisan ang mi-alma sanglit sila lang mga gagmay ang gikasohan luyo sa daghang mga financier nga nagbutang og puwesto sa mga merkado publiko.

Alang nila, di gyud hingpit masumpo ang Last 2 sa lalawigan bisan pa man og gisuportahan ni Davao del Sur Governor Douglas Cagas ang kampanya batok sa mga ilegal nga sugal.

Usa sa mga rason mao ang matud pa pipila ka mga pulis nga giingong nagdawatan og suborno gikan sa mga kapitalista sa ilegal nga sugal.

Sa miaging semana, aktibo ang mga otoridad sa pagsikop sa nalambigit sa sugal nga Last 2 apan way bisan usa sa mga dagkong nagpaluyo niini ang nadakpan.

Tungod niini, nipalag ang mga gagmay'ng usher nga nadakpan.

"Kutob lang sila sa mga gagmay unya igo lang kuhaon among kuwarta asa man na padulong," pahayag ni alyas Christy, kinsa nidangop sa Sun.Star SuperBalita.

Niya pa, gisudlan nila ang dali nga pagkita og kuwarta pinaagi sa maong sugal sanglit lisod mangita og legal nga trabaho.

"Alangan mamaligya mi og druga aron makasuporta mi sa among pamilya. Naa gain diha mga kriminal gyud nga bayran pagpatay og tawo, gawasnon man lagi," niya pa.

Gisulti niya nga lisod sumpoon ang illegal Last two operation tungod kay nakasapi usab ang mga ubang miyembro sa kapulisan pinaagi sa ilang sinemana nga "ekis" (protection money).

Una nang gipahayag ni Governor Cagas nga di molungtad ang Last 2 sa usa ka lugar kon walay pagtugot sa hepe sa kapulisan ug mga lokal nga opisyal.

Bisan pa man, padayong gihagit sa gobernador ang mga otoridad nga sulbaron ang ilegal nga sugal sanglit kini sab maoy direktiba sa pamuno nasud.

Nangunay mismo ang Charm Radio, istasyon ni Cagas, sa pagpunay'ng pag-atake sa Last 2 apan daw wa gihapon nilampos.

"Naay nakasapi nga mga pulis ug mga mayor," pagklaro ni Cagas.

Bisan si Senior Superintendent Ronald dela Rosa, provincial police commander, naghuwat og mga accomplishment sa iyang mga hepe sa kalungsuran nga mahurot pagpanakop ang mga nagpaluyo sa mao nga sugal.

Nagdumili sab si Dela Rosa pagluwat og pahayag kon nakasapi ba ang kapulisan sa Last 2 nga gikuha sa 3 digits, 4 digits ug 6 digits sa Philippine Lotto Draw kada adlaw.

Giila nga usa ka dakong hagit sa pagbag-o sa imahe sa kapulisan nga sumpoon ang tanang illegal nga pasugal sa lalawigan sanglit pipila sa mga gagmay nga ilang mga nadakpan nitiyabaw human di sila makahatag og payola ngadto sa mga labaw'ng opisyal. (SuperBalita)