BISAN gamay apan gilantaw nga makatabang na sa mga trabahante ang dyutay'ng usbaw sa ilang suhulan nga bag-o lang giaprobahan sa Regional Tripartite Wages and Productivity Board (RTWPB).

Unang gipangayo sa mga trabahante sa lalawigan sa Davao del Sur ang umento sa ilang suhulan nga P75 matag adlaw apan sa hukom nga gipakanaug sa RTWPB, P21 lang matag adlaw ang bag-ong usbaw.

Sugod karong bulan sa Agosto, ipatuman na sa mga employers ang bag-ong direktiba sa suhulan human sa gihimong tigom tali sa RTWPB ug Trade Union Congress of the Philippines (TUCP).

Apan daghan gihapon ang niangal sanglit mahal na matud pa ang presyo sa lana ug ang dugang P21 dili igo sa mga nagdawatan sa minimum wage sama ni Conrad Porsueco sa lungsod sa Bansalan, kinsa nagdawatan lang og kapin P5 mil matag bulan sa usa ka kompaniya nga iyang gi-trabahoan.

Nasayran nga ang mga trabahante sa non-agricultural companies dinhi sa Southern Mindanao modawat og P271 dugang P15 sa ilang cost of living allowance (Cola).

Samtang ang nangempleyo sa mga agricultural sector ug retail service companies nga kapin sa 10 ka mga trabahador, modawat og bag-ong minimum wage nga P261 ug dugang P15 sa ilang Cola.

Apan ang new wage order gisang-at ngadto sa National Wage Productivity Board niadto pang Biyernes sa milabayng semana aron nga uyonan.

Didto sa lungsod sa Sta. Cruz, Davao del Sur, gibarogan sa mga trabahante nga ang P75 nga usbaw maoy angayan nilang dawaton.

Sama ni Braulio Ugay Jr., usa ka coconut shell remover (tigbunot og lubi) sa Coco Davao, kinsa nag-suweldo lang og P6,000 matag bulan, nagkanayon nga di kini paigo sa pag-sustento sa panginahanglanon sa iyang pamilya.

Si Ugay nagpatungha sa unom niya ka mga anak.

Samtang pipila sab sa mga trabahante ang nagmahay ngadto ni Presidente Benigno Aquino III sanglit wa niya giapil og hisgot sa iyang State of the Nation Address niadtong Lunes, ang usbaw sa suhulan.

Daghan unta kanila ang naglaum nga mahatagan kini og panaad sa bag-ong pamuno nasud.

Sagad sa mga gipamulong ni Aquino mao lamang ang pagsumpo sa korapsyon sa gobyerno ug pagsiguro nga di magutman ang mga mag-uuma tungod kay tagdon niini ang mga basakan nga ilang umahon.

Nanawagan sab ang mga trabahante nga hatagan og pagtagad sa gobyerno ang labor contracting gumikan kay wala silay kasigurohan kon unsay ilang padulngan ugma damlag. (Orlando B. Dinoy)