NAKASIGURO kaha si Mikey Arroyo, miangkon nga representante sa kongreso sa Ang Galing Pinoy, usa ka partylist nga ang mga miyembro mao ang mga sekyu, mga drayber ug mga vendor?
Nahimugso kini nga pangutana tungod kay ubay-ubay na nga mga sekyu ug mga drayber wa miangkon ni Mikey nga magdala sa ilang tingog didto sa kamara baha.
Labing uwahi nga mipasaka og protesta mao ang drayber sa tricycle nga si Danilo Antipasado.
Si Antipasado nga nagsulti nga mokita siya og P200 matag adlaw sa pagpamasahero sa iyang sikol, nagpasaka sa iyang protesta ngadto sa House of Representatives Electoral Tribunal.
Tumong sa protesta sa drayber sa sikol nga ipatangtang sa HRET ang "Ang Galing Pinoy" gikan sa party list organization ug di tugotan ang nominee nga si Mikey nga molingkod isip representante sa mga sekyu ug mga drayber.
Sumala ni Antipasado nga ilang kauban sa ilang hut-ong ra ang angay nga magdala sa ilang tingog ug dili si Mikey nga anak sa adunahang pamilyang Arroyo.
Sayo niini, ang militanteng Akbayan nagpasang-at usab og protesta ngadto sa Korte Suprema aron dili tugotang makalingkod si Mikey sa kongreso.
Si Mikey gikataho nga nagsulti nga 'harassment' kining gihimo kaniya sa mga nagprotesta.
Ambot kun sakto ba ug haom ba ang pulong nga harassment niining asuntoha.
Kun nahimo lamang nga lehitimong sekyu o dili kaha drayber sa de pasahero nga sakyanan si Mikey tingali way mopalag sa iyang posisyon.
Apan kanus-a nahimong sekyu si Mikey? Kanus-a nahimong drayber sa sikol ug dili kaha sa dyip si Mikey?
Tungod kay wa man miila kaniya isip kauban nga sekyu ug drayber labing maayo nga moresayn si Mikey ug mohigop na lang og kape sa bugnaw nga lugar.