USA ka lalaki nga nag-atubang og kasong attempted rape ang nasikpaw sa ginsakpan sa Digos City Police Office (DCPO) didto sa mismo sa iyang pinuy-anan.

Ang dinakpan giila ni Chief Inspector Anthony Padua, hepe sa DCPO nga si Danny Yalon, 39, minyo apan way trabaho, lumolupyo sa Purok Uwangon, Barangay Cogon, siyudad sa Digos.

Subay sa mando sa Regional Trial Court nga gipaguwa ni Branch 13 Judge Carmelita Sarno-Davin, nakadoket ang kaso sa suspek sa criminal case number FC-125-10.

Hulyo 19 ning tuiga, gipaguwa sa korte ang warrant of arrest aron patubagon ang dinakpan sa sumbong batok kaniya.

Nasikop gilayon sa DCPO ang suspek didto sa iyang gipuy-an mga alas 8:30 sa buntag, Biyernes.

Nagtingkagol na ang 39-anyos sa selda sa DCPO samtang gitakda nilang pahibaw-on ang korte nga ila nang nasikop ang sinumbong subay sa paglapas niya sa RA 7610 kun Violation against Women and their Children. (Dondon Dinoy)