HUMAN gibawi ni Mayor Sara Duterte ang suporta sa lokal nga kagamhanan ngadto sa 1003rd Infantry Battalion, si Department of National Defense Secretary Votaire Gazmin mianhi dinhi sa siyudad aron sutaon ang maong hitabo niadtong Huwebes.
Si Gazmin nagbutyag nga buot niyang masayran ang hinungdan nganong gibawi sa mayor ang iyang suporta sa militar.
"Well, kaya ako pumunta rito, gusto ko ring makipag-usap sa kanila. Gusto kong malaman kung bakit nagkaganito," suma ni Gazmin dihang gihinabi sa mga tigbalita kauban ang SuperBalita didto sa Eastern Mindanao Command, Camp Felix Apolinario, Panacan.
Ang kalihim maningkamot nga mahibalik ang pagsalig sa lokal nga kagamhan ngadto sa militar aron maghiusa sila sa pagsanta sa suliran sa insurhensiya.
"Baka may pagkukulang ang sundalo o ano, then titingnan natin paano natin maibabalik yung tiwala ng LGU officials sa amin," pung ni Gazmin.
Si Gazmin nagpadayag nga buot niyang makig-istorya sa mayor aron ilang mahisgutan ang mga butang nga angay himuon aron mahibalik ang pagsalig sa mayor.
"Kailangan namin siguro magkausap baka hindi lang nagkakaintindihan or they must have a good reason for withdrawing their support. Baka hindi naman related sa kasuldaluhan, maybe realignment or may gusto silang project whatever, but I'm here to talk to them," pasabot ni Gazmin.
Kahinumdoman, niadtong miaging semana gisulti ni Duterte nga di na niya ipadayon ang suporta ngadto sa 1003rd IB nga gipangulohan ni Brigadier General Eduardo del Rosario.
Si Duterte wa makauyon sa counter-insurgency program nga nalatid sa Internal Security Operations (ISO) nga gisumite ni del Rosario niadtong Hulyo 5.
Ang mayor namahayag nga mas maayo pa nga iyang pakusgan ang programa sama sa paggahin og pundo aron ibayad sa mga rebelde nga mobalik sa gobyerno aron mahunong ang insurhensiya. (AD/JCZ)