SAMTANG kasagaran saludo sa State of the Nation Address (Sona) ni Presidente Noynoy Aquino, duna sab gyuy pipila nga nikuwestyon nganong naghisgot pa siya og dugang mga anomaliya ni kanhi presidente Gloria Macapagal-Arroyo. Ngano kunong di siya makahimog iyang antog karong siya na ang presidente?
Matod pa, daw nanghanig na si Noynoy nga adto ibasol kang Arroyo kon mapalpak man siya karong siya na ang naa sa poder. Wa sab maghisgot og klarong plano kon unsaon nato pagguwa niining kahimtang karon.
Ingon ba gyud ang dating sa iyang Sona? Alang kanako, di baya. Hinuon, iyang giklaro karon kon asa siya nanukad human hapit gihurot ni Arroyo ang pundo sa gakamhanan.
Buot ipasabot, giklaro na daan ni Noynoy nga nagkinahanglan pananglit ang iyang kagamhanan og dugang pundo alang sa calamity fund nga halos gitilok na ni Gloria alang sa iyang distrito sa panahon sa piliay.
Hinuon, duna siyay mga punto nga wa sab ko makauyon.
Pananglitan, di ko uyon sa iyang mga panglantaw kabahin sa pagpalambo sa atong sistema sa edukasyon. Nagkamahal na karon ang edukasyon alang sa mga kabos ug ang pagdugang sa mga tuig sa elementarya ug high school makapasamot nga di na hinuon kini makab-ot pa sa mayoriya sa atong populasyon.
Kinahanglan hinuon nga dugangan ang pundo alang sa edukasyon aron masulbad ang kakulang sa mga classroom ug ubang mga pasilidad, mga tarong nga libro, ug mga kalidad nga mga titser.
***
Dihang gisuportahan ni Presidente Aquino ang iyang mga gipangtudlo diha sa Cabinet ug ubang mga opisyal labi na kini si Customs Commissioner Joselito Alvarez, nakaingon ko sa akong kaugalingon nga mao kini karon ang iyang sayop.
Lalim bay usa ka tikasan sa duwa nga golf ang gitudlo aron malimpyo ang usa ka bureau nga gituohan nga usa sa labing hugaw?
Apan sa laing bahin, mahimuot sab ako karon sa mga komentaryo sa atong mga higala nga naa sa maong bureau dihang nibisita kini si Alvarez dinhi sa Sugbo alang sa anibersaryo sa Customs dinhi. Matod pa, sulod sa pipila ka semana nga naa siya sa poder, iyang napahunong ang tanang matang sa smuggling sa tibuok nasod apan na-maintain ang pag-igo sa collection target.
Tungod niini, nakaingon ko sa akong kaugalingon nga angayan tingale nga hatagan kini si Alvarez og benefit of the doubt.
Maayo lang sab kay duna siyay mga district collector sama kang Cebu Customs Collector Ronnie Silvestre nga gawas nga padayong nag-perform pinaagi sa pagkuha sa target matag bulan sukad siya natudlo sa pagsugod niining tuiga, duna pa gyud siyay daghang social responsibility projects.
Pananglitan, nakig-coordinate siya sa Rotary Club of Fuente aron mapahigayon ang usa ka photo exhibit diin ang halin sa mga hulagway nga kinuha sa mga empleyado sa bureau gihatag sa usa ka tunghaan sa mga autistic children.
Kining maong mga proyekto gawas kini sa iyang pagka-aktibo isip Bosconian labi na sa iyang pagsuporta sa pagtukod sa Bosconian International Chamber of Commerce (BICC) nga magtigom na sab karong Augusto 4, 2010 sa gabii anha sa Abuhan Dos.
***
Matod pa ni Efrain Pelaez, way obligasyon ang iyang Marina Mall nga mobayad og buhis sa Lapu-Lapu City Hall kay kini sulod man sa Mactan Export Zone. Di kini usa ka pabrika ang Marina Mall nga angayang maka-benepisyo sa mga incentives sa usa ka export zone. Apan sigi na lang ug huwaton nato ang korte nga modesisyon niini.
Apan nahibulong lang ko nganong lakip sa mga top 20 taxpayers sa Syudad sa Lapu-Lapu nga locator man sa Mactan Export Zone. Ang mga tinuod nga pabrika mao na hinuon ang namayad og buhis.