Editoryal: Papel sa pari

DAGHAN na kaayong mga reklamo nga nangahilom lang batok sa pipila ka mga pari nga nangalambigit og mga kontrobersiya.

Ning uwahi, usa ka diocesan nga pari ang giakusahan og sexual harassment sa mga babayeng tinun-an sa usa ka pribadong tunghaan.

Ilang reklamo nga gipitik pitik ang ilang mga bra ug gihikap ang ubang bahin sa ilang lawas samtang sila gipakumpisal sa pari.

Hinuon gipanghimakak kini sa pari sa interbyu sa Sun.Star Superbalita.

Maorag nasubli ni nga hitabo nga gikalambigitan sab sa laing pari mga kapin sa usa ka tuig na ang nakalabay.

Bisan kon daghan na ang mga kontrobersiya nga ilang gikalambigitan, pabiling lig-on ang Simbahang Katuliko.

Niadtong duna gyuy klarong mga nabuhat nga di maayo, hilom silang `gipa-reform.’

Nakabalik ra sab sila sa pagserbisyo human sa reformation ug pagkahilom sa mga kontrobersiya.

Ang mga pari tawo ra sab nga dunay higayon matuwandos gyud sa kasal-anan.Duna man ganiy uban nga gikatahong wa gyud mapitol. Naa baya gyuy sipat na gyud bisag unsaon pa.

Pero huna-hunaon lang usab unta sa pari nga alang usa ka yanong magtutuo, siya nagrepresentar sa Simbahan busa dako kaayo ang ilang pagrespeto.

Naa ganiy uban nagtan aw sa pari nga mao ang Simbahan.

Mao nang dako kaayo ang impact sa ilang pagtuo kon ang pari mao nay mapandol.

Hinaot nga hinuktokan kini niadtong mga pari nga hingtungdan kay di yano ang ilang papel.

Apan sa mga magtutuo, angay silang di magpatarog tungod kay ang pari instrumento ra sab sa Simbahan. Inay kondenahon ug sawayon, tabangan silang makabangon ug bantayan aron di na sab mapandol.

Related Stories

No stories found.
SunStar Publishing Inc.
www.sunstar.com.ph