TANKER nga nagkarga og gasolina nidaro sa upat ka mga sakyanan ug pasahero nga nag-atang og kasakyan sa national highway sa Brgy. Basak, dakbayan sa Mandaue kagahapon sa buntag.

Magbaguod gyud sa pagbayad ang drayber sa Isuzu tanker nga si Felix Briones, 35, lumad nga taga-lungsod sa Barili ug kasamtangan nga nagpuyo sa Zone Paliya, Barangay Paknaan, Mandaue city tungod sa grabeng kadaot nga iyang nahimo.

Iyang giharos ang mga sakyanan nga nag-una kaniya lakip na sa lalake nga nagpaabot sa iyang kasakyan samtang nagbarog daplin sa dalan.

Updates on President Benigno Aquino III's presidency

Matod pa ni PO2 Dante Flores nga sa mga alas 10:15 kagahapon sa buntag nga ang Toyota Corolla sedan nga gimaneho ni Allan Duenas, taga-lungsod sa Consolacion ug ang PUJ nga gimaneho ni Renjie Solis, naghunong karsada.

Nagpaabot ang maong mga sakyanan nga makalusot kay ilang gihatagan og agianan ang Suzuki multicab nga gimaneho ni Mario Gamboa, taga Brgy. Lahug, dakbayan sa Sugbo, nga ni-left turn hinungdan nga nibabag sa karsada.

Apan si Briones nga nagmaneho sa tanker nidumbol sa Toyota Corolla ug gumikan sa kakusog sa impact, nilahos ang Corolla ngadto sa multicab ni Gamboa nga naghunong.

Wa na makontrolar ni Briones ang tanker, nisaghid usab kini sa multicab ni Gamboa dayon nilahos ngadto sa nagpadulong nga PUJ nga gimaneho ni Menitoro Andrino, taga-Doña Rosario, barangay Basak, Mandaue.

Nabalian pa gyud sa iyang tiil ang pasahero nga nagpaabot og kasakyan diha daplin sa dalan nga si Sixto Ricablanco.

Nabilanggo lang sud sa pipila ka oras si Briones kay nisaad nga maoy moabag sa gastuhan sa tambalan ni Ricablanco ingon man ang pagbayad sa mga kadaot nga naangkon sa mga sakyanan nga iyang gidaro.

Nagduda ang traffic investigator sa Mandaue City Traffic Division nga nawad-an sa preno ang sakyanan ni Briones niadtong higayona.