LUYO sa reklamo sa mga gagmay'ng nga nasikop tungod sa pagpatay sa ilegal nga sugal nga Last 2, nagdumili gihapon ang kapulisan sa pagtubag sa isyong pipila sa ilang ginsakpan ang nagdawatan og payola (protection money).

Nityabaw ang mga gagmay'ng nagpataya sa maong sugal sanglit sila lamang ang gipangsikop ug way bisan usa sa mga taga fronton kun dagkong financier ang nasikpaw sa mga pulis.

Ang sugal nga Last 2 gibase sa resulta sa Philippine Charity Sweepstales Lotto draw matag adlaw.

Tulo ka mga wa magpailang usher ang nialma sa dihang sila ra maoy gidakop sa kapulisan human gironda ang pipila lang sab ka mga lungsod sa Davao del Sur.

Alang nila, lisod nga mapaundang sa gipaluyohang kampanya ni Davao del Sur Governor Douglas Cagas ang ilegal nga sugal.

Usa sa mga gitumbok nga rason mao ang pagdawatan og 'ekis' sa pipila ka mga opisyal sa ubang lungsod sa probinsya.

Si Mercy (tinuod ngan gipugngan) niangkon nga nabuhi sila sa pagpataya sa maong sugal ug dinhi gikuha ang balon sa upat niya ka mga anak nga pulos nagtungha.

Si Governor Cagas, di pa dugay, nagkanayon nga di gyud molungtad ang maong sugal sa usa ka lugar kun wa nihatag og pagtugot ang mga pulis ingon man ang mga mayor.

Apan si Senior Superintendent Ronald dela Rosa, provincial police commander, niangkon nga lisod ang hingpit nga pagpakgang niini sanglit daghan og trabaho ang mga otoridad.

Hinuon, nagdumili si Dela Rosa pagtubag sa pasangil ni Cagas.

"Dili lang kana ang trabaho sa police. It's not entirely a police problem. Mas mabigat ang socio-economic dimension nyan, which requires corresponding intervention to prevent its recurrence," sumala niya.

Sumala sa kapulisan, prayoridad nila ang pagpakgang sa mga dagkong krimen.

Gikuha sa mga dagkong financier ang pagpataya sa Last 2 gikan sa mga resulta sa draw sa udto, alas 5 sa hapon ug gikan sa 3 digits, 4 digits ug 6 digits sa inadlaw nga Philippine Lotto Draw.

Bisan pa man, padayon ang hagit ni Cagas ngadto sa otoridad nga ipakita nilang wa sila gadawat og payola mao nga padayong nikiat ang mga illegal gamblers sa siyudad, mga lungsod sa Malita, Sta. Maria, Matanao, Magsaysay ug Bansalan.

Duna say katahap nga pipila ka pulis mangronda lang tungod kay wa mahatagi. (SuperBalita)