NAKAGAWAS na gikan sa selda sa Investigation and Detective Management Section ang 26 ka mga tawo nga naaresto sa kapulisan atol sa anti-gambling operation sa balay sa igsuon ni Manny Pacquiao nga si Isidra Pacquiao-Paglinawan niadtong Huwebes sa hapon.
Sila makalaya human gipagawas ni General Santos City RTC executive Judge Oscar Noel ang temporary release order human gitugotan ang petisyon sa mga suspek nga makapiyansa pinaagi sa ilang abogadong si Giovanni Mata.
Sa pikas bahin, plano karon sa abogado sa mga suspek nga mopasaka sila og kontra demanda batok sa mga pulis tungod sa ilang giingong nga "unlawful arrest, arbitrary detention ug robbery."
Nasayran nga gisulod sa kapulisan ang balay ni Isidra sa Barangay San Isidro subay sa search warrant nga giluwatan sa korte aron dakpon ang suspek nga si Isidra nga sumala pa operator sa last two digits, apan wala siya niadtong panahona.
Gibarugan sab sa amahan ni Pacquiao nga si Rosalio sa pakighinabi kaniya sa Bombo Radyo nga kadaghanan sa mga giaresto iyang mga bisita atol sa iyang adlaw'ng natawhan.
Gipanghimakak usab ni Rosalio nga nalambigit ang anak o kinsa man sa miyembro sa iyang pamilya sa illegal gambling.
Ang last two digit operations dugay nang naghitak sa nagkadaiyang dapit didto sa Central Mindanao, nga gibase sa resulta sa lottery draw sa sweepstakes. (Edgardo Fuerzas)