USA ka mamalitay og puthaw ug botelya gipusil sa mga armadong tawo sa alas 3:40 sa hapon, Sabado sa probinsiya sa Maguindanao.
Nailhan sa kapulisan ang biktima nga si Noel Dela Veda, 41, minyo, ug molupyo sa Barangay Katingawan, Midsayap, North Cotabato.
Sigun sa taho gikan sa Cotabato Police Provincial Office, nga misulod ang biktima sa usa ka hilit nga dapit sa Barira Maguindanao, sakay sa ilang traysikad aron mamalit og puthaw ug botelya.
Sumala pa nga giatangan na diay kini sa wala mailhing mga armadong lalaki, dayon gipusil gamit ang M16 armalite rifle.
Namatay diha-diha dayon si Dela Veda nga naka-angkon og unom ka samad pinusilan sa nagkadaiyang parte sa iyang lawas, samtang ang kauban sa biktima nga si alyas Opong ang nakadagan paingon sa luwas nga dapit.
Dali nga mitaho ang kauban sa biktima ngadto sa militar ug kapulisan hinungdan nga nakuha ang patay nga lawas niini.
Si Opong nagbutyag nga pulos mga armado sa mga tag-as nga pusil ang mga suspetsado nga maoy mipusil ngadto nila.
Nanaghap si Maguindanao Police Provincial Director Marcelo Pintac nga posibling naalaan nga asset sa militar ang biktima.
Wala hinuon hilabti sa mga suspek ang kwarta ug personal nga kagamitan sa gipatay.
Kapulisan padayong nag-imbestiga aron masuta ang tinuod nga motibo sa pagpatay sa biktima ug ilang mailhan ang mga suspetsado. (Edgardo Fuerzas)