4 ka van gisunog

UPAT ka mga container vans nga gipanag-iyahan sa Dole-Stanfilco ang gisunog sa gidudahang mga sakop sa rebeldeng New People's Army didto sa Purok 20 Sabina, Barangay Camanlangan, lungsod sa New Bataan, Comval Province, Sabado sa buntag.

Sa report gikan sa Comval Province Police Provincial Office, nasayran nga pasado alas 8:00 sa buntag ang mikabat sa 40 ka mga armadong lalaki nga gituohang sakop sa NPA pinangulohan sa usa ka Ka Isko sa Front Committe 27 misunog sa upat ka mga vans samtang nagkarga kini og mga produktong saging nga ihatud unta padung sa dakbayan sa Davao.

Sa pagresponde sa mga otoridad, tulo na lamang ka van ang naabtan sanglit ang usa nga may plate number BDN-119 nga gimaneho sa usa ka Mario Mendoza wala na didto sa nahitabuan sanglit nakasibat kini ug nakapadayon og biyahe padulong sa siyudad sa Davao. Ang maong van gamay lamang ang danyos.

Ang laing tulo ka mga nahibiling van nga nagbatun sa plakang LUB-256, gidrayban sa usa ka Henry Falcis, gipanag-iyahan sa Echo Hauler Inc.; ang LUV-510 nga gidrayban sa usa ka Teodorico Laranan, ug gipanag-iyahan sa Javier Trucking; ug PUB 832, gidrayban sa usa ka Dioscoro Turanug gipanag-iyahan sab sa Echo Hauler Inc.

Migawas sa inisyal nga imbestigasyon sa otoridad nga kalit nga gipara sa mga rebelde ang mga van ug way daghang istorya, gisilaban nila kini.

Nangadaut ug nasunog ang mga van apil ang lulan nga saging, apan way gikatahong naangol o nasamdan sa mga drayber.

Nagtuo ang mga otoridad nga posibling kapakyas sa paghatag og revolutionary tax ngadto sa mga rebelde ang hinungdan sa pagsunog sa mga sakyanan.

Kapulisan sa lungsod sa Compostela mihimo na og imbestigasyon sa hitabo.

Samtang gilusad na usb ang hot-pursuit operation karon sa kasundaluhan aron sa paggukod sa mga NPA. (Marvin Pineda)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph