NAKADALIKYAT ta og kadiyot sa opening day sa 2010 Cesafi season niadtong Dominggo diha sa Cebu Coliseum. Tinuod gyud nga bongga ang maong opening day.Gigamitan og wide screen ug makadasig nga presentasyon sa pipila ka mga dancers sa unibersidad.
Apan atong naobserbahan nga sukwahi sa mga nangagi, minus ang mga nihan-ok sa coliseum, dili sama kaniadto nga bisan gani ang general admission magpunsisok ang mga manna-aw. Daghang mga rason nga atong ikonsiderar kalabot niini.
Una, basin wa kaayo mapahibawo ang mga estudyante nga mao man gyud unta kini sila ang captured crowd sa lega.
Mahimong ang kakuwang sa publicity nakatampo usab niini. Ang mga duwa sa opening day di sab kaayo impresibo. Ug ambot nakatampo ba kaha usab ang mga kontrobersiya sa miaging tuig.
Talking of controversy, kagahapon diay morag gisubhan man og kontrobersiya ang Cesafi bisan og ikaduhang adlaw pa lang gani sa pagsugod sa 2010 season. Tiaw mo bay na-forfeit ang UV Baby Lancers sa first game unta diin ilang ikasangka ang CIT Wildkittens. Matod pa nga wa kuno kadawat si coach Jun Pepito og schedules sa mga duwa hinungdan wa sila kahibawo nga duna diay silay duwa.
Mora’g mabaw ra man ning rasona. Isip coach imo gyud nang responsabilidad ang pagpangayo og schedules sa mga duwa. Kon way nadawat sa niaging mga adlaw, nganong wa man sab mangayo atol sa opening day nga niapil man ta ang tanang team sa parade.
Labing siguro nasagmuyo ang mga nakapulta kagahapon kay sakto sila sa bayad apan nabitin ug wa makompleto ang ilang gibayran.
Mahimong sa sunod higayon magpanagana na sila og tan-aw.
Ambot og unsa kahay silot nga ipahamtang sa atong higala nga si commissioner Felix Tiukinhoy kabahin niini. Hinaot pa unta nga di kini mahimong sumbanan sa uban kay tingalig maparehas na hinuon ni og usa barangay tournament. junmigs0622@yahoo.com