BAG-ONG pangalan maoy naghatag na usab og laing dungog sa Pilipinas sa natad sa billiards sa dihang ang di ilado sa international scene nga si Jundel Mazon ang milangkat sa titulo sa 2010 Guinness World Series of Pool – 10 Ball Challenge didto sa Mal Taman Anggrek complex sa Jakarta, Indonesia.

Gipildi ni Mazon si Irsal Nasution sa host Indonesia sa makabungog nga 10-5 nga kadaugan aron iuli ang championship trophy ug ang US $40,000 nga premyo.

Updates on President Benigno Aquino III's presidency

Human mabiyai, 1-5, sa unom ka racks, si Mazon mihinayhinay og pupo sa kadaugan sa sunod nga upat ka mga racks aron tablahon ang score, 5-5.

Gikan niadto wa na gyud kabawi pa ang Indonesian kinsa permi masugamak sa kalisod gumikan sa permi usab nga pagtago ni Mazon sa bolamano.

Pipila ka higayon, napugos si Nasution sa paggamit sa iyang jump cue nga maoy hinungdan nga permi usab mabintahan ang bag-ong sikat nga Pinoy.

Si Mazon miabot sa finals sa dihang gipakaging ang no. 5 sa world ranking nga si Darren Appleton sa England samtang si Nasution mipildi usab ni 2007 Guinness 9Ball Tour Champion Chang Jung-Lin sa Taipei sa laing semis match.