KUYAWKUYAW nga mahugno na ang riprap sa sapa sa Mananga sa sityo Crusher,Lawaan-III nunot sa padayon nga pag-uwan.

Unom ka mga balay ang gikabalak-an nga maapiktahan kon mahugno na gyud ang riprap.

Updates on President Benigno Aquino III's presidency

Duna nay duha ka balay ang nagsugod na og kaguba.

Si Ethel Ababon, 36, minyo nga 18 ka tuig nang nagpuyo sa maong dapit nitug-an nga nilihok na ang ilang bongbong niadtong Miyerkules sa miaging semana.

Laing balay ang nakasinati sab og pag-uyog hinungdan nga gipasidan-an na silang mga nagpuyo duol sa riprap sa pagbakwit.

Si barangay konsehal Reggie Marababon sa Lawaan-3 nitug-an sa mga tigbalita nga ang unom ka mga tag-iya sa balay ila nang gihangyo nga mohikling na lang sa mas luwas nga dapit dala ang ilang mga pamilya.

Dunay tangke sa tubig nga nga nagtungtong sa riprap ang gipatangtang na lang tungod kay sa matag uyog niini, magsige man sab og tulo ang tubig nga makapasamot sa hulga nga mahugno kini.

May nangaguba na nga balay resulta sa hinayhinay nga mudslide.

Ang mudslide nagsugod niadtong tulo ka adlaw nga sunod sunod nga uwan sa miaging semana.

Mga lumolupyo nitataw nga sa gabii di na sila mangatulog sa ilang balay apan mobalik sa adlawan.

Si konsehal Marababon nibutyag nga ilang ipa-assest sa City Social Welfare Office ang sitwasyon aron kahimuan dayon og evacuation plan ang apiktadong mga lumolupyo. (VLM)