DI MAN malalis nga makahatag gyud og bentaha sa mga estudyanti kon ipatuman sa administrasyon ni Presidenti Noynoy Aquino kining 12-year education cycle.

Ang pagdugang og duha ka tuig sa pagtungha sa elementary ug high school nagpasabot kana nga dugang preparasyon alang sa kolehiyo. Ug kining paagiha gihimo na kini sa ubang nasod sama sa Estados Unidos sa America.

Ang deperensya lang, sangkap sa kahimanan ang mga tunghaan sa Amerika ug wala sila magkuwang og magtutudlo.

Kon mahinayon kini sa Pilipinas, segurado mosamot og kalawgaw ang sistema sa atong edukasyon.

Wala pa gani nato masulbad kining problema sa kakuwang og classroom ug magtutudlo magdugang na pod na og duha ka tuig sa pagtungha.

Nasayod ta nga nakita sa pamunoan karon sa edukasyon unsa ka iwit ang Pilipinas sa standard sa edukasyon sa kalibutan. Busa, gitinguha gyud nila nga mapalig-on ang atong sistema.

Ug dili lang baya pinaagi sa pagdugang og duha ka tuig nga matupngan nato ang standard sa ubang nasod.

Ang atong mga magtutudlo, pwera niadtong nagpagamit pagpanikas sa eleksyon, dunay katakos baya sa paghatag og maayo edukasyon.

Bisan nagkagidlay ang atong mga tunghaan sa daghang kakuwangon pero kon resourceful ang mga magtutudlo, walay katarungan nga dili magiyahan ang mga estudyanti ngadto sa gitinguhang standard.

Ang pagdugang og tuig gud, magpasabot kana og dugang gasto - dili lang sa gobiyerno apan mismo sa nagpatungha.

Mas maayo man to sa Amerika kay duna may school bus ang mga public school nga mokuha libre kada adlaw sa mga estudyanti. Unya, kompleto sab ang mga classroom sa kahimanan.

Intawon ang atoa dire, nagsinardinas ang mga estudyanti. Ambot pila lang kaha ka mga computer sa matag eskwelahan. Ug naa ba kahay insaktong pansayan ang matag tunghaan.

Busa, angay lang timbangon paayo ni Presidenti Aquino unsay unahon niya - ang pagdugang sa duha ka tuig o pag-atiman una sa panginahanglan sa atong mga eskwelahan.