NILANDING sa balay tambalanan ang usa ka driver human gipusil ug gikawatan og motorsiklo niadtong Domingo mga alas 7:00 sa gabii didto sa siyudad sa Valencia, Bukidnon.

Giila ang biktima nga mao si Arjun Odchigue, 22, lumad nga taga Kibunsod, lungsod sa Magsaysay, Misamis Oriental.

Nahitabo ang insidente sa gipuy-an niini sa Valencia dihang nag-sideline og drive si Odchigue.

Matud sa paryente sa biktima nga nahinabi sa Sun.Star Superbalita nga adunay usa ka wala mailang lalaki ang unang nakighigala niini. Dihang dali kaayong nasuod sa biktima ug naaghat nga mosakay kaniya.

Tungod niini nananghid una ang biktima nga magpatubil sa iyang motorsiklo apan sa wala pa miabot sa gasoline station kalit lang siya nga gimandoan niining ipahunong.

Samtang duna usab nisunod nga duha ka mga lalaki sakay sab sa laing motorsiklo

nga gituohang kauban sa suspek.

Si Odchigue nidumili sa mando sa biktima nga mohunong apan nakurat kini dihang gitionan na og pistola ang iyang ulo. Naghinay sa pagpadagan ang biktima apan deretso kining gipusil sa likod nga milapos sa iyang dughan.

Dali sab misibat ang suspetsado ug gitangag ang iyang motorsiklo. Dali sab nga gitabang sa mga residente sa dapit ang biktima ug gidala sa duol nga balay tambalanan apan tungod sa kritikal nga kahimtang niini giduso kini sa Northern

Mindanao Medical Center (NMMC) ning siyudad sa Cagayan de Oro. Hinuon ang kaso gisunod na sa kapolisan Valencia Police Office.

Matud sa paryente nga leksiyon kini sa pipila ka mga driver nga dali lang kayo mosalig bisan wala maila. (Stephanie V. Berganio)