PATAY na nga nidangat sa tambalanan ang usa ka taxi driver nga gidunggab sa usa ka tawo samtang naghantak pasado alas 9:00 sa gabii niadtong Miyerkules sa Sityo Taytayan, Barangay Buhisan, dakbayan sa Sugbo.
Naglisod sa imbestigasyon ang kapulisan kay way bisan usa nga mikooperar aron ila untang mailhan ang nipatay kang Roy Odo Cordero, 36, minyo, nagpuyo sa nahisgutang lugar.
Sa pasiunang imbestigasyon nga gihimo nila ni SPO3 Fiel Mendaros ug mga kauban sa Homicide Section sa Cebu City Police Office, nagbutyag nga diha sa dapit ang biktima uban sa iyang mga higala nga naghantak.
Sa dihang nagpadayon ang sugal, ang killer nga wa pa mailhi nilipot sa biktima ug dayong dunggab sa wala niya nga lusong-lusong.
Nahagba ang biktima ug didto na nag-alibwag ang mga tawo nga nag-alirong sa hantakan.
Gamit ang sakyanan sa barangay, gidala sa mga tanod ang biktima sa Cebu City Medical Center apan gideklarar nga dead on arrival.
Gipaningkamutan sa kapulisan nga maila kon si kinsa kadtong mga nagduwa ug ipatawag sa ilang buhatan aron makuhaan og pamahayag subay sa ilang nakita sa wa pa ang pagdunggab.