USA ka biyuda ang namatay human naghikog sa alas 2:00 sa hapon niadtong Sabado didto sa siyudad sa Kidapawan.

Giila sa kapulisan ang biktima nga mao si Emily Pascua, 47, katabang ug molupyo sa Barangay Lanao.

Sa nahagpat nga taho gikan sa Cotabato Police Provincial Office, nasuta nga nakit-an na lamang ang patay nga lawas sa biktima didto sa bay sa iyang amo nga nagbitay gamit ang pisi sa moskitero nga gihikot sa iyang liog ug ang pikas tumoy gihigut sa kisame sulod sa iyang kuwarto.

Sa wa pa naghikog si Pascua, namatikdan pa sa iyang mga paryente nga siya nagmasulub-on ug mora'g dunay gibati nga sakit sa lawas.

Pagkahuman ug panglaba sa biktima, wala na siya mikaon og paniudto ug midiretso na sa iyang kuwarto. Wala na migawas sa kuwarto sa hapon hinungdan nga gipugos sa pahnukas amh pultahan sa iyang lawak ug dako ang ilang kakurat kay patay na siya.

Nagtuo sab si Kidapawan City PNP Director Supt. Chino Mamburam nga problema sa pamilya sa biktima ang hinungdan nganong naghikog ang biktima.

Gitahasan na ni Kidapawan City Mayor Rodolfo Gantuangco ang City Social Welfare Office nga mohimo og lakang aron sutaon ang sunod-sunod nga kasong paghikog sa siyudad.

Kahinumduman nga niadtong milabay nga semana, naghikog patay sab si kanhing market administrator Carlos Rapis.

Ang kapulisan padayong nag-imbestigar kon wala bay foul play sa kamatayon sa biktima. (Edgardo Fuerzas)