ANG kapulisan sa siyudad sa Tagum padayong nag-ila sa inahan sa usa ka batang babaye nga bag-o lamang nahimugso nga napalgang patay didto sa Villa Magsanoc Subdivision, Barangay Mankilam siyudad sa Tagum, Sabado sa buntag.

Sa report gikan SA Tagum City Police Station nasayran nga pasado alas 7:30 sa buntag niadtong Sabado, usa ka Dalia Flores, molupyo sa dapit ang nakadiskubre sa patay'ng lawas sa masuso.

Sumala pa nga nanilhig si Flores sa iyang tugkaran dihang nasiplatan ang cellophane kilid sa iyang panimalay.

Sa iyang pagsusi, nakurat siya dihang nakita ang patay'ng lawas sa usa ka babayeng masuso nga bag-o pa lamang nahimugso.

Pahayag ni Flores nga wala pa maputol ang pusod sa bata, may lama-lama pa sa dugo ang iyang lawas.

Mga sakop sa Scene of the Crime Operatives (Soco) sa Davao del Norte gilayong miresponde aron susihon ang hitabo.

Gipahiluna na karon sa usa ka punerarya ang patay'ng lawas sa bata aron mahatagan ug disenteng lubong.

Samtang gisusi na sa kapulisan kun kinsa ang way puangod nga inahan sa masuso nga mibilin lamang kaniya sa lugar. (Marvin Pineda)