MAG-UUMA nga mopauli na unta sa iyang balay kalit nikirig gumikan sa poste sa Davao del Sur Electric Cooperative (Dasureco) nga natumba ug nahumol sa tubig nunot sa grabeng kakusog sa uwan.
Sa uwahing taho nga nadawat sa Davao del Sur Provincial Police Office (DDSPPO), giingong ang insidente nahitabo mga alas 9:45 ang takna sa gabii, Hulyo 31.
Gialarma dayon ni Barangay Kapitan Dante Lausa ang Matanao Police sa nahitabo sa ilang lugar.
Sa pagsubay sa kapulisan, nilagom na ug wa nay kinabuhi si Ramonito Calayon, 35, ug lumolupyo sa Barangay New Katipunan, lungsod sa Matanao, Davao del Sur.
Sila si Senior Inspector Charlie Merca nga nitubag sa alerto nagbutyag nga unang nipasilong ang biktima kuyog sa iyang mga kauban sa umahan nga mao sila si Vicente Amahan ug Renato Pia, pulos taga Sitio Sampaguita sa Barangay New Katipunan, Matanao.
Nihapit pa ang tulo sa bay ni Rolly Jorolan aron mopahulay gikan sa ilang pagtikad sa basakan nga andam nang tamnan og humay.
Sa dihang nituang ang uwan, nidesisyon ang tulo nga mopadayon sa ilang pagpauli apan gidemalas ang mag-uumang si Calayon, sanglit natumban niya ang usa ka live wire nga nahumol sa lapok.
Didto kalit nikirig ug nilagom dayon ang biktima tungod sa kuryente nga nilatay sa iyang lawas mao nga wa na matabang pa.
Ang kuryente konektado sa balay ni Jesus Amado apan naputol sa dihang natumbahan og punuan sa kahoy tungod sa kakusog sa hangin niadtong higayona. Ang biktima gilayong namatay ug gihaya na sa ilang panimalay sa maong dapit. (Dondon Dinoy)