PATAY ang usa ka kanhi kauban sa mga armado human gipusil sa iyang mga kauban sa didto sa lungsod sa Matanao, Davao del Sur.
Nahitabo ang insidente mga alas 5:30 sa sayong kabuntagon, Dominggo.
Ang biktima, Crisaldo Banan, kinsa bag-o lang nitahan sa iyang kaugalingon ngadto sa sabakan sa gobyerno, namatay human gipusil sa di matino nga gidaghanon sa mga bandido nga nagpaabot kaniya nga mogawas sa iyang balay.
Giingong nangulo sa paglikida sa biktima mao si Yolly Guinang alyas Ka Dindin ug Elmer Lasib alyas Ka Tirzo.
Natusak sa mga bala sa di pa matinong kalibre sa armas ang lawas sa biktima hinungdan nga namatay.
Mga sakop sa Citizen Armed Forces and Geographical Unit (Cafgu) nga nakadungog sa buto-buto niresponde gilayon sa maong lugar ug na-engkwentro ang mga bandido.
Nahitabo ang kapin 10 minutos nga pagbinayloay og mga buto sa armas ang mga Cafgu human nisukol ang mga bandido. Way nasamdan o napatay sa grupo sa mga Cafgu apan di pa masuta sa bahin sa kaaway.
Si Barangay Kapitan Romeo Lauda ngapahayag nga nahitabo ang panagtakos sa mga Cafgu ug mga bandido didto mismo sa maong barangay.
Nanaghap ang mga Cafgu nga labihan ang gibating kasuko sa mga bandido ngadto sa kanhi nila kauban human niampo sa balaod.
Sila si Master Sergeant William Castillo, team leader sa Cafgu, padayong nigukod sa mga bandido nga daling nisibat padung sa bukirang bahin sa lugar.
Nakig-alayon na ang mga Cafgu ngadto sa kapulisan alang sa man-hunt operation batok sa mga bandido. (Dondon Dinoy)