KIDAPAWAN CITY - Patay ang usa ka barangay kagawad human giunay og pusil ang kaugalingon alas 9:20 sa gabii niadtong Martes didto sa probinsiya sa Cotabato.
Giila ang biktima nga mao si Jolly Bandal, 41, minyo ug molupyo sa Barangay Tuwael, President Roxas.
Sa nahagpat nga taho gikan sa North Cotabato Provincial Police Office, nasayran nga mibisita si Bandal sa iyang paryente didto sa Barangay Maybola, Tulunan ug didto natulog gumikan kay dunay panagtapok sa pamilya.
Apan nakurat na lang ang mga ig-agaw sa biktima sa diha nga nakadungog sila og buto sa armas sulod sa kuwarto nga gikatulgan ni Bandal.
Sa diha nga gisusi, ila na lang nakit-an nga naligo na sa kaugalingong dugo ang biktima ug wala nay kinabuhi human nga nagpusil tumong sa iyang ulo gamit ang kalibre .45 nga pistola.
Narekober sa kapulisan gikan sa kuwarto nga gikatulgan sa biktima ang usa ka kalibre .45 nga pistola ug duha ka magazine sa maong armas.
Nagtuo si Tulunan Mayor Lanie Candolada nga posibling problima sa pamilya ang hinungdan kon nganong nagkutlo sa kinabuhi ang biktima.
Sa kasamtangan, padayon pang naghimo og dugang imbestigasyon ang kapulisan aron nga masuta nga way foul play sa kamatayon sa kagawad. (Edgardo Fuerzas)