SA sinugdanan gimugna sa Dios ang kalibutan. Iyang gipaangayan sa matahom nga mga bahandi sa kinaiyahan. Kon ayuhon kini sa paggamit sa katawhan walay kalisod, walay gotumon sukwahi sa nasinati karon nga mitibugsok ang ekonomiya.

Ang mga langgam ug isda maoy pipila lamang sa tipik sa mga bahandi nga gitagana sa Ginoo alang kanato. Apan daghan ang nag-abuso sa ginama sa Dios.

Updates on President Benigno Aquino III's presidency

Sa Cordova, dihay mga higayon nga luthangon ang mga langgam ug tiruhan sa ilegal nga panagat ang isdaanong kadagatan sa maong lungsod. Si Mayor Adelino Sitoy nga nagpangga sa ilang kalikupan migukod aron masumpo ang pagpasipala sa mga malapason.

Giparakrakan ang mga mahilabtanon nunot sa pagpatuman sa balaod pinaagi sa kapulisan ug sa mga sakop sa bantay dagat.

Karon, wala nay mamusil og langgam, napitol na ang illegal fishing nuntan sa proyekto nga bird ug fish sanctuaries. Kon dunay mokisaw ug motugaw sa palibot, pagkabuotan sa mga langgam ug isda kay adto gilayon sila modangop ug mopasilong sa sangtwaryo timaan nga sila milikay sa tino nga kamatayon.

* * *

Gagmay rag utok ang mga langgam ug isda kon itandi kanatong mga tawo. Maglumba gilayon sila sa sangtwaryo kay didto protektado ang ilang kinabuhi. Apan unsay binuhatan sa tawo nga labaw sa tanang linalang. Pangawkaw, abuso, tulis, drugas, patay ug uban pa maoy naghari. Mga babaye namaligya sa ilang unod.

Mitrabaho sa lingam mass-age aron dali ra ang ibugti nga salapi gikan sa kahangol ug nagharab-harab nga mga lalaki. Dako kining kaulawan ug kalapasan sa balaod sa yuta ug sa langit.

Pagkontrolar

Saludo ko sa bag-ong haon nga sakop sa hunta probinsyal nga si Bokal Teddy Ouano. Isip Vice-Chairman sa Committee on Peace and Order, gipasar ang resolusyon nga palabdan ug lig-unon ang intelligence network sa kapulisan aron kapugngan ang krimen pinaagi sa pagahin og salapi. Wala siya mo believe nianang pagtukod og Task Force aron pagsulbad kay ang mahinungdanon mao ang prevention sa kriminalidad.

Lakip nga panid-an mao ang grupo sa mga tulisan, gang ug ang mga sindikato sa drugas nga maoy dakog natampo sa mga hitabo. Pun-an pa niining “milk shake” nga drugas nga gikabuangan karon sa mga adik-adik.

Kining maong drugas kombinasyon sa pinulbos nga shabu ug nubain nga inig kauros sa pagdangdang ipasuyop sa syringe ug i-injection.

Duna nay nalisoan sa pangisip ug duna nay namatay. Gikabalak-an usab nga mokatap ang laing matang sa drugas nga Cocaine sumala pa ni Atty. Paul Clarence Ouaminal, kanhi Undersecretary sa Dangerous Drugs Board. Masumpo kaha? Kay wala man gani mapitol ang magtabako og marijuana ug ang kabataang magsigig hingos og rugby. yahoo ID & e-mail add. csa_1156@yahoo.com cell #: 0905-250-4643