KUTAW. Ang P221 milyunes nga budget ni Cebu city Mayor Mike Rama gipung-olan sa konseho tungod kay matud pa naay mas importanteng gamitan sa kwarta kay sa banda ug sayaw-sayaw sa mayor.
Kini nagpasabot lang nga tinuod gyud nga kulang ang kwarta sa panudlanan sa dakbayan. Usa niini ka rason mao ang dakong balayran sa siyudad ngadto sa Jica sa ilang dakong utang sa pagmugna sa SRP.
Di ba makakutaw man ni sa atong utok nganong mopalit og kuraol nga eroplano ang city hall nga wa man diay kwarta? Pagkaluoy ni Mayor Mike. Bisag di siya mosugot wa siyay mahimo kay gusto man sa iyang padrino, Kong. Tomas Osmeña.
Gipaagi lang ni Kongresista Tomas sa iyang alalay nga si Bise Mayor Joy Young ang iyang damgo nga makaangkon ang dakbayan og bisag karaang eroplano, nga morag maguwang pa gani ni Mampor sa edad.
Bugalbugal man ning katuyoan ni Tomas pinaagi ni Young nga paliton ang tulo ka eroplano unya himulbulan lang ang duha aron magamit ang pesa sa usa. Unya ipatimbang ang gihimulbulan? Wa mo kyapi?
Wa pa gani ang dakbayan makaimpas og bayad sa dakong utang sa JICA tungod sa SRP, mogasto na sad alang sa eroplanong gubaon nga gi-junk na sa DepEd.
Ang pamaagi ni Young sa pag-angkon sa gubaong eroplano morag way kwartang mogawas sa dakbayan apan ang pagbuhat og eskuylahan nga ibaylo sa eroplano sa DepEd di ba kwarta lang gihapon?
Sa laing bahin, swerte ang mga department head sa dakbayan sa Sugbo kay gipalitan na usab og bag-ong sakyanan nga mikabat og P27milyunes. Abi nako nagkalisud ang siyudad sa kwarta?
****
CUSTOMS. Morag wa makaklaro si Mayor Mike Rama sa punto nga kuhaon og balik sa Bureau of Customs (BOC) ang ilang edipisyo nga gihimo ni kaniadto presidente Arroyo nga Malacañang of the South.
Pag-ingon ni Presidente Noy Aquino nga wa siya magkinahanglan og presidential assistants ug di na niya gamiton ang maong edipisyo, si Cebu Customs Collector Ronnie Silvestre misugyot nga kuhaon og balik sa BOC ang ilang opisina kaniadto.
Ang maong edipisyo iya na sa BOC o gipanag-iya na siya sa kagamhanangnasyonal. Sa ato pa way katungod ang dakbayan sa maong building. Di angayan maguol si Mayor Mike sa iyang beautification project sa Plaza Independencia kay ang taga customs way interes sa plaza.
Ang pagkuhag balik sa edispyo sa aduana di usab supak sa plano ni Tomas nga himuon nga pantalan ug passenger terminal ang Aduana alang sa biyahe sa barko ug mga fastcraft sa rotang Bohol-Cebu.
Ang una nakong pagsud og balik sa Aduana human nahimong Malacañang sa dihang nagselebrar si kanhi Sec. Cerge Remonde sa iyang ika-50 nga adlawng natawhan. Dako kaayo ang hawan sa pantalan luyo sa Aduana nga pwede pa mahimo nga passenger terminal.
Bisag unsa pay buhaton ni Mike di siya makapugong nga kuhaon og balik sa customs ang ilang opisina tungod kay di ni siya iya sa siyudad kay sa BOC na siya nga building.
Ang customs naghuot sa ilang gamayng opisina diha sa Cebu International Port (CIP) nga tago kaayo. Angayan nga ibalik ang customs sa ilang naandan nga opisina aron usab makita sa publiko ang ilang trabaho.
Ang BOC usa sa mga ahensya sa gobyerno nga naapil sa lista nga taas ang korapsyon. Ang pagbalik-opisina sa BOC sa ilang edipisyo makahatag og pagsalig sa publiko ingon man garbo ug dungog sa taga aduana.
Gipanindot kaniadto ni Collector Boy Odilao ang maong edipisyo.
Apan sa pagdaug ni presidente Arroyo sa piliay 2004 ang maong edipisyo iyang gihimong Malacañang agig pasigarbo sa Sugbo sa iyang pagdaug batok ni anhing Fernando Poe.
(elespinoza53@yahoo.com)