NADAKPAN ang usa ka batan-ong lalake na nitulis sa usa ka tiguwang babaye nga mangomprahay pasado alas 3 kagahapon sa kaadlawon sa dalan V. Sotto, Barangay Tinago, dakbayan sa Sugbo.

Si Concepcion Rosales, 55, taga McArthur Boulevard, niasoy ngadto kang SPO4 Antonio Belo sa Waterfront police station nga naglakaw siya sa dapit aron mangompra sa merkado publiko sa Carbon.

Updates on President Benigno Aquino III's presidency

Apan niduol kaniya ang suspek nga si Jerry Mascariñas, 26, taga McArthur Boulevard, dayong tion kaniya sa iyang kilid ug gikuha ang gamay nga sling bag.

Human makuha ang bag, nidagan gilayon ang suspek.

Nisinggit og pakitabang ang biktima nga naatol sab nga dunay taxi nga niagi ug gipasakay sa drayber dayon gihatod sa Waterfront police.

Si SPO1 Vicente Espinido uban sa mga kauban nihimo og hot pursuit operation ug gibalik ang dapit nga nahitaboan.

Didto nailhan sa biktima ang suspek nga nagbarugbarug daplin sa dalan.

Daling gidakop sa kapulisan ang suspek, apan wa na mabawi pa ang bag sa biktima nga may sulod nga kapin sa P900.

Ang mga kabanay sa suspek niabot sa police station ug giulian og P1,000 si Rosales sa hangyo nga di na lang mokiha kang Mascariña ug pabuhian kini.

Apan si Belo miimbargo sa kwarta ug wa ihatag og balik sa biktima.

Tuyo sa kapolisan nga mokiha ang biktima kay gihagoan og dakop sa kapolisan ang suspek.

Ang suspek padayon nga nagtingkagol karon sa bilanggoan samtang naghuwat sa kasong ipasaka batok kaniya.