NIAY pahimangno sa mga bana nga sayon kaayong mangabuso ug magpasagad sa ilang responsibilidad sa pamilya.

Kay napakyas sa paghatag og pinansyal nga suporta sa iyang pamilya sud sa lima ka tuig human sila nag-away sa iyang asawa niini, nag-atubang og kasong kriminal ang usa ka bana nga taga dakbayan sa Sugbo.

Updates on President Benigno Aquino III's presidency

Si Lecenio Rasola, nagpuyo sa Kinasang-an, Pardo, dakbayan sa Sugbo, girekomendar sa Carcar City Prosecutor’s Office nga pasakahan sa kasong kalapasan sa Republic Act (RA) 9262 nga mas nailang Anti-Violence against Women and their Children Act tungod niini nga nagsugod niadtong Abril 2005.

Nitumbok ang piskaliya nga “economic abuse” ang gihimo ni Rasola sa iyang asawa ug duha ka mga anak human iyang gibiyaan kay aduna na siyay laing pamilya ning higayona.

Niini, magtingkagol ang suspek samtang husayon ang iyang kaso sa korte kay way gitugot nga piyansa ang balaod.

Ang reklamo sa asawa ni Rasola (tinuod nga pangalan atong gipugngan) nagpadayag nga niadtong Abril 23, 2005 nagkaaway sila sa iyang bana unya nadapatan gyod siya niini.

Giingnan siya ni Rasola nga “sample” pa lang kadtong iyang nahiaguman busa pwerte niyang hadloka sa iyang nasinati busa nihukom siyang makigbuwag na lang sa iyang bana.

Human sa insidente, nipauli ang suspek sa ilang pinuy-anan sa dakbayan sa Toledo ug niadtong Abril 26, 2005 nibalik kini sa ilang gipuy-an kuyog na ang inahan niini unya gipanguha ang iyang mga butang.

Sa samang panahon, giingnan niya si Rasola nga gikinahanglan nga suportahan gyod niya ang pinansyal nga panginahanglan sa ilang mga bata apan hangtod ning higayona wa siya motuman sa gisaad.

Nisamot og kasakit ang iyang gibati kay dihang nagkasakit ang usa sa iyang mga anak ug nangayo siyag kwarta aron maggasto sa pagpatambal, gibalibaran siya unya giingnan siya ni Rasola nga di na siyang manginlabot kanila kay aduna naman siyay laing pamilya.

“Under the law, failure on the part of husband to provide finacial support to his family constitutes the crime charged.

Hence, the said crime is comitted, and respondent is probably liable thereof,” nagkanayon si Carcar City Prosecutor Richard Abangan sa resolosyon nga giandam niya sa kaso. (JECT)