LALAKENG gibuwagan sa iyang kaipon nagpakamatay pinaagi sa pagpusil sa iyang ulo gikan nga nag-inom.

Usa ka gubaon nga kalibre .38 nga revolver ang iyang gigamit nga may tulo ka mga bala.

Updates on President Benigno Aquino III's presidency

Kini nahitabo gawas sa balay sa usa ka kanhi polis sa Santa Lucia Village, Barangay Kasambagan, siyudad sa Sugbo, pasado alas 10 sa milabay nga gabii.

Ang biktima giilang mao si Pablo Rivera Jr., 27, way klarong trabaho.

Sa pasiuna nga imbestigasyon nga gihimo ni PO3 Roger Nedamo ug mga kauban sa Homicide Section, nagkanayon nga nag-inom ang biktima uban sa iyang mga higala sulod sa balay sa kanhi pulis.

Samtang nag-inom, nibunot sa iyang armas nga kalibre .38 ang biktima ug gibadlong sa iyang mga kainom.

Apan si Rivera niingon nga di kini makabuto kay guba-on.

Nigawas ang biktima ug nananghid nga motubag sugo sa lawas.

Apan samtang didto na siya sa gawas, gisigihan og kablit ang armas hangtod nga nakabuto. Naigo ang tampihak sa biktima.

Ningresponde ang mga sakop sa Emergency Rescue Unit Foundation (ERUF) ug gidala ang biktima sa Cebu City Medical Center (CCMC) apan nakabsan sa kinabuhi alas 2:31 kagahapon sa kaadlawon.

Dugang nasayran sa kapolisan nga ang biktima nagsigi og hisgot kabahin sa iyang kaipon nga mibiya kaniya ug tua na karon sa kaulohan.

Namatikdan nga naguol ang biktima kay wa na niya makontak sa cell phone ang kaipon sulod sa pipila na ka mga buwan.

Nagtuo ang kapolisan nga mao kini ang hinungdan nga gusto kining magpakamatay.

Ang armas nga may usa ka kabhang ug duha ka mga bala anaa na karon sa posisyon sa kapulisan.

Dugang imbestigasyon ang ilang himoon.

Samtang sa laing hitabo, tungod sa hubak, hamtong nga babaye naghikog pinaagi sa paghigot og pisi sa iyang liog sulod sa ilang balay sa dakbayan sa Mandaue.

Ang nakit-ang patay giila nga si Elma Diaz, 50, minyo, taga Barangay Maguikay.

Sigun sa kapulisan nga pasado alas 2:00 sa hapon niadtong Dominggo, ang inahan sa namatay nga si Monica Perez niadto sa balay sa iyang anak aron paghatod og pagkaon.

Apan wa na siya diha sa iyang kuwarto ug sa dihang gisusi sulod sa panyasan iyang nakit-an ang iyang anak nga diha na sawog ug aduna nay higot sa liog gamit ang pisi.

Si Diaz dali untang gidala sa pribadong tambalanan apan gideklarar nga patay nang nidangat sa tambalanan.

Hinuon ang kapulisan nitataw nga way foul play ang maong hitabo.

Gani paghiabot nila sa crime scene, ang mga polis nga pinangulohan ni PO3 Joselito Catabas nakakuhag mga ebedensya sama sa pisi ug suicide note.

Nasayran ang namatay naghikog tungod sa iyang asthma nga nipaingon na sa grabeng ubo hinungdan nga nakahukom siyang maghikog.

Gani niana pa lang buntag nisulti na kini sa iyang inahan nga gusto na siyang maghikog tungod sakit.(JFT/DRT)