Lalakeng `badlungon’ gipatay sa `vigilantes’

GIPATAY sa gituohang mga vigilantes sa lungsod sa Balamban, Sugbo nga nagsakay og motorsiklo ang usa ka lalakeng nailang badlongon ug gitumbok nga nalambigit sa drugas ingon man sakop sa fraternity niadtong Dominggo sa hapon sa Sitio Lacdon, Brgy. Cambuhawi.

Patay ang biktimang si Jeffrey Vasquez, 22, ulitawo, tungod sa naangkong daghang mga samad pinusilan sa nagkadaiyang parte sa lawas.

Duha ka mga mamumuno nga nagmotorsiklo nipusil patay sa biktima.

Way nakaila sa mga mamumuno kay nag-helmet, nag-bonnet, nagsul-ob sa itom nga jacket ug daling nisibat paingon sa bukid human sa krimin.

Si SPO3 Arvie Banate, imbestigador sa Balamban Police Station nga nahinabi sa Sun.Star Superbalita, nagkanayon nga mga alas 5:50 niadtong hapon sa Dominggo nipauli na unta si Vasquez paingon sa ilang balay gikan sa buwangan sa maong lugar.

Apan paglabang niini atbang sa buwangan sa may sityo Lacdon, ang duha ka mga killer nga gikan sa Poblacion nga nagsakay og motorsiklo kalit lang nibutho dayon nipusil sa biktima.

Sa ilang pagresponde sa lugar patay na ang biktima ug sa paghiling nila sa lawas didto sa walang bulsa niini sa likod nakuha ang daghang mga marijuana nga wa pa malukot.

Si Banate nipadayag nga sa pagkakaron gisubay nila ang motibo sa illegal nga drugas, samtang gilantaw usab nila ang pagka-badlungon sa biktima.

Matod niya nga maldito kaayo kini diha sa ilang merkado publiko.

Lakip sa ilang gikonsiderar mao ang pagka-miyembro niini sa Alpha Kappa Rho (Akrho).

Nagtuo ang kapulisan sa Balamban nga posibling dunay spotter ang duha ka mga mamumuno sanglit paggawas sa biktima diha sa bulangan kalit usab kaayo kining nibutho dayon namusil.

Di hinuon makakompirmar si Banate kon mga sakop na usab kini sa mga vigilante sa Balamban ang nipatay sa biktima.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph