TULO ang nangaangol human nibalitok ang usa ka elf niadtong Lunes mga alas 10:30 sa gabii sa Upper Puerto ning siyudad sa Cagayan de Oro.
Si PO3 Albert Hermoso sa Police Station 6 (PS6) sa Puerto nibutyag sa Sun.Star Superbalita nga nawad-an og brake ang Isuzu elf nga nagdala og plaka GEU-350 nga gimaneho ni Isidro Saba, residente sa Alae, Manolo Fortich, Bukidnon.
Samaran ang mga sakay niining sila si Allan Garbasa, 18, ug silingan nga si Julie Gumanig, 24, dalaga, sa susamang dapit.
Gisaysay sa usa ka biktima nga padulong na sila niadtong gabhiona sa Manolo dihang nawad-an og brake si Saba hinungdan sa pag-ubos niini ug pagkayabo sa mga sakay nga pulos pinutol nga kahoy sa gemilina. Nabalitok usab ang elf hinungdan sa ilang pagkaipit.
Naipit ang tiil ni Garbasa samtang si Gumanig nakaangkon og bun-og sa lawas dihang nabunal. Samaran usab ang driver.
Giresponde sa kapolisan sa Police Station 6 (PS6) sa Puerto ang insidente ug gipangdala sa Northern Mindanao Medical Center (NMMC) si Garbasa ug Gumanig samtang sa Puerto Community Hospital si Saba. (SVB)