ANG Lakas-Kampi-CMD sa House of Representatives nagtagbo niadtong miaging adlaw aron hisgutan ang pagahimuong imbistigasyon sa bag-ong namugna nga Truth Commission.
Sa tigom nga gitambongan ni Pampanga Representative Gloria Macapagal-Arroyo ug sa iyang mga anak nga sila si Camarines Sur Representative Diosdado "Dato" Arroyo, Ang Galing Pinoy Representative Mikey Arroyo, bayaw nga si Negross Occidental Representative Iganacio Arroyo ug ubang mga kaalyado, ilang gikasabutan nga magtagbo pag-usab sa di madugay.
Ilang sabutan ang pagdangop sa Korte Suprema aron ipadayag ang pagsupak sa pagsusi sa komisyon sa wa-maresolbar nga mga kontrobersiya nga mga asunto ubos sa administrasyon ni kanhi Presidenti Arroyo.
Si Mikey nagsulti nga ang wa nila mauyoni mao ang nakatakdang pag-imbistigar sa komisyon sa mga 'pinili' nga kaso.
Atong balikan unsay tumong sa Truth Commission. Ang komisyon gimugna aron susihon ang mga alegasyon sa kurapsiyon, pagpanikas sa eleksiyon ug abuso sa tawhanong katungod.
Di pa dugay, gisulti ni kanhi pangulo Arroyo nga andam siya sa imbistigasyon ug ug mobulig sa komisyon. Nausab ba ang huyop sa hangin?
Angay magpasalamat ang mga Arroyo nga mga kontrobersiyal nga kaso nga gipasangil kanila matuki aron nga kun wa silay sala makabatun na sila og kalinaw sa hunahuna.
Maayong matudlokan na kining mga kasoha aron ang mga hingtungdan dili na hasulon sa ilang konsensiya.