USA ka batan-on nakit-ang patay nga naglutaw-lutaw duol sa Passig Islet sa Barangay Bato, lungsod sa Sta. Cruz, Davao del Sur human naanod sa baha didto sa siyudad sa Digos.
Ang mananagat sa Barangay Aplaya, Digos, nga mao si Dominador Restauro, maoy nakakaplag sa biktima nga si Jerrel Estabaya, 24, mga alas 7 sa buntag, Lunes.
Si Estabaya gitahong naanod sa baha nga dala sa gituohang buhawe, Hulyo 29 sa gabii. Sukad niadto wa na siya igkita apan naluwas ang iyang kaubang higala human sila naabtan og dakong baha sa ilang pagtabok sa sapa didto sa Barangay Dulangan, Digos.
Kahinumdoman nga nitabang ang Philippine National Red Cross (PNRC) ug City Disaster Coordinating Council (CDCC) sa pagpangita sa biktima.
Gikuha sa mananagat ang patay'ng lawas sa biktima nga naglutaw sa dagat ug gilulan sa iyang bangka padung sa baybayon sa Baywalk didto sa Barangay Aplaya.
Gitunol na ang patay'ng lawas sa biktima ngadto sa iyang pamilya ug gihaya sa Padilla Funeral Homes aron kahatagan og disenteng lubong. (Dondon Dinoy)