PARA nako di angayang palabyon ang dako kaayong isyu nga naglambigit sa buhatan sa National Food Authority (NFA ). Tiaw moy nangadaot sa ilang bodega ang mga sinakong bugas,samtang nag-antos sa kagutom ang mga kabus ug timawa.

Kun napriso ang gigutom kay nangawat di kita mosugot nga mahimong gawasnon ang mga opisyal sa NFA nga maoy responsable sa nangabahong bugas kay wa giapod-apod sa merkado aron mapalit sa baratong prisyu.

Updates on President Benigno Aquino III's presidency

Ang nakapait karon na nila ipakaon sa mga gigutom nga kabus nga baho na ang bugas. Nagtuo tingale silag balibaran, mokaon man gani ug mga pagkaon gikan sa basurahan bisan ug pan-os na.

Way kaluoy ug nagpakita lang kun unsa ka iresponsable kining mga kadagkoan sa nfa. Wa silay kalainan sa kanhi administrasyon ni Arroyo nga sobra ang gidaghanon sa giangkat nga bugas ug ang gihunahuna ang dakong komisyon.

Basta gobiyerno naandan naman gud nga maayo lang sa pagsugod sa imbestigasyon ni kinsa man kanila ang nag-atubang ug kontrobersya. Maayo unta ug lahi karon ang gobiyerno ni P-Noy, wa gyuy paglurang ug dali ang resulta imbistigasyon hangtud nga mapasaka ang kaso.

ABUSO SA KOMPANIYA SA LANA

Good news, kay nagpakunhod sa ilang presyo ang mga kompaniya sa lana,apan ang bad news kay 25 sentimos lang ang gipatuman niini. Way mga uwaw ug nagpakita lang sa ilang kaabusado.

Ang ilang gihimo usa ka pagbugalbugal sa katawhan ug way respeto sa gobyerno. Nasayud na kita nga ang presyo sa lana maoy magdektar sa presyo sa mga nag-unang palaliton.

Sa 25 sentimos nga pag-ubos di kini makapugos sa mga negusyante aron sa pag-usab sa ilang prisyo. Gawas sa dakong umento sa presyo sa lana diin dali ra sab kaayong mopaburot ang mga negosyante.

Ambot kun duna bay mahimo niini ang gobiyerno ni P-Noy kay duna may balaod nga naghatag ug katungod sa mga oil company nga sila maoy magboot sa prisyo tungod sa kompetisyon.

Maayo tingaleg usbon ang maong balaod aron makagukod ang gobiyerno!Kay atong nakita nga ilang giabusohan pag-ayo ang oil deregulation law.

MAHAL ANG PRESYU SA SUGBO

Tan-awa kun unsa ka mga abusado kining tulo ka mga higanting kompaniya sa lana. Mahal kaayo ang prisyu sa kurudo ug gasolena ikompara ngadto sa Manila ug Mindanao.

Distribution cost ang ilang gihimong katarungan. Wa sila malipong nga mas layo man ang Mindanao ikompara sa Sugbo.

Simpleng katarungan, mao ang ilang kaabusado kay waman say gihimo ang gobiyerno.

Dako hinuon natong kalipay kay dunay kasong gipasaka ang mga negusyante sa Sugbo,pinaagi sa pagpanguna ni Gobernador Gwen Garcia. Hinuon, ato pang paabuton kun madutlan ba kining mga tawhana.

NAGPAKAUWAW NGA KONGRESISTA

Dali kaayong nakatingog ang kadaghanan sa mga kngresista pinaagi sa pagpalagpot ni Kongresista Chavit Singson Jr. human madakpi didto sa HongKong tungod sa paghupot ug illegal nga drugas.

Di nila duphan si Singson kun maprobar nga kini sad-an sa kaso niining giatubang. Ang makauuwaw kay siya usa ka kongresista nga maoy tigpanday ug balaod ug unya nadakpan.

Mao nay ilang giingon “only in the Philippines”.

(efren_lonzon@yahoo.com Text 09084171222)