USA ka lalaki napalgang patay nga nabulit og mga samad ang kalawasan gigapos gamit ang masking tape ug gitaptapan ang nawong didto sa Purok 5, Barangay Alejal, lungsod sa Carmen Davao del Norte, Dominggo sa buntag.

Nailhan ang biktima nga mao si Jomar Lubang, 18, ug molupyo sa Purok 1, Barangay Tanglaw, lungsod sa Braulio E, Dujali, Davao del Norte.

Sa report nga nakuha gikan sa Davao del Norte Police Provincial Office, nasayran nga pasado alas 5:00 sa buntag napalgan ang biktima nga wa nay kinabuhi nga nagbuy-od ug dunay daghang samad sa lawas didto sa maong lugar.

Gigapos pa sa mga suspek gamit ang masking tape ang duha ka kamot sa biktima ug gitaptapan ang nawong una gilabay sa maong lugar.

Samad pinusilan ug dinunggaban sa kalawasan ang nahiaguman sa biktima nga maoy gituohang hinungdan sa iyang kamatayon.

Ang inahan sa biktima nga si Marilou maoy miila kaniya kagahapon sulod sa Rivera Funeral Parlor sa lungsod sa Carmen.

Matud pa sa inahan nga Sabado sa hapon ulahing nakit-an ang biktima human nananghid kanila nga molakaw sanglit dunay importanting adtuon.

"Nananghid man ni sa akoa nga molakaw daw siya niadtong Sabado sa hapon, natingala na lamang mi pagkabuntag nga wa na kauli," sulti ni Marilou sa SuperBalita.

Natingala na lamang sila sanglit wa na kauli ang biktima ug ila na lamang nabalitaan nga dunay gi-salvage nga tawo hinungdan nga ilang gisusi.

Gisulti sab ni Marilou nga way hulga sa kinabuhi nga nadawat ang iyang anak ug wa sab siyay kaaway.

Hinuon, giangkon niya nga mahilig og barkada ang iyang anak.

Kapulisan sa lungsod sa Carmen mihimo na og dugang imbestigasyon sa hitabo. (Marvin Pineda)