USA ka sakop sa barangay tanod ang gipusil patay sa alas 7:00 sa gabii niadtong Sabado didto sa probinsiya sa Maguindanao.
Nailhan sa kapulisan ang biktima nga mao si Daud Tambil, 40, minyo ug molupyo sa Salipada K Pindatun.
Sigun sa nakutlo nga taho gikan sa Maguindanao Police Provincial Office nga samtang naglakaw ang biktima gikan sa ilang outpost pauli na unta sa ilang bay giatngan siya sa duha ka wala mailhing mga armadong lalaki ug gipusil gamit ang kalibre .45 nga pistola.
Patay gilayon si Tambil nga naigo sa iyang ulo, dughan ug likod sa lawas.
Dali sab nga misibat ang mga suspetsado paingon sa wala matino nga direksyon dala ang isyo nga M1 carbine rifle sa biktima.
Nagtuo ang mga otoridad nga posibling agaw-armas ang motibo sa pagtipi kang Tambil gumikan kay gikuha ang iyang armas.
Hangtud karon blangko pa ang kapulisan sa mga suspetsado nga mipatay sa biktima ug padayon pa silang nag-imbestiga. (Edgardo Fuerzas)