TULO ka mga tawo ang naangol sa dinamita nga mibusikad sa alas 10:00 sa buntag niadtong Lunes didto sa Kiamba, Sarangani Province.
Nailhan sa kapulisan ang mga biktima nga sila si Charlie Hidalgo, CJ Hidalgo ug Redeen Delote.
Gibutyag sa mga otoridad nga nahitabo ang pagbusikad sa Wood Bridge Beach Resort sa Purok Bialong, Poblacion Kiamba.
Matud pa ni Sarangani board member Cornelio Martinez nga adunay miagi nga bangkang de motor sa maong baybayon ug dayon miitsa og eksplosibo ug wa nagdugay mibuto.
Dali sab nga misibat ang duha ka wala mailhing suspetsado paingon sa wala matino nga direksyon.
Gisapupo gilayon ang mga samaron sa mga personahe sa Wood Bridge Beach Resort ug gidala sa Kiamba District Hospital.
Mga biktima anaa gahapon sa talandugong kahimtang.
Nasuta sa mga sakop sa Explosive Odnance Disposal Team sa Philippine Army nga dinamita ang gigamit sa mga suspetsado.
Hangtud karon padayon pang naniid ang kapulisan sa mga suspek sa hitabo. (Edgardo Fuerzas)