DEAD on arrival sa tambalanan ang usa ka dalaga human siya naigo sa kilat sa alas 7:00 sa gabii niadtong Lunes didto sa Barangay Talomo River, distrito sa Calinan, siyudad sa Davao.

Ang biktima mao si Jennifer Fernandez, 18, out-of-school youth, lumad nga taga Gen. Luna, Cotabato City ug kasamtangan nga nagpuyo sa Campo 4, Barangay Talomo River.

Base sa blotter sa Calinan Police Police Station, sa wa pa mikilat malipayong kaayong nag-text ang biktima sa iyang mga higala gamit ang iyang cellphone.

Mga kabanay sa biktima nagbutyag sa kapulisan nga samtang nag-text ang biktima kinsa naglingkod sa bangko nga gibutang gawas sa ilang balay, kalit mikilat ang kalangitan.

Human mibagis sa kalangitan ang kusog nga kilat, suma sa mga nakasaksi, kalit natumba ang biktima ug nawad-an sa iyang panimuot.

Si Fernandez daling gitabang sa iyang mga kabanay ug gidala sa Isaac Robillo Hospital sa Calinan.

Sa ilang paghiabot sa maong tambalanan, mga doktor nagbutyag nga di na nila matabang ang biktima sanglit wa na siya nagginhawa.

Mga ginikanan sa biktima igo nalang sa paghilak sanglit sayong nahanaw kanila ang pinangga nilang anak.

Ang patay'ng lawas sa biktima atua karon gihaya sa St. Peter's Funeral Homes sa Calinan. (AD)