SAMTANG gipasirad-an sa mga silingang dakbayan sa Sugbo ang mga lingam spa, si Bise Mayor Joy Augustus Young nidapit sa operators sa kontrobersyal nga matang sa masahe sa pagbalhin sa Sugbo.
Sila si Mayor Jonas Cortes sa dakbayan sa Mandaue ug Mayor Paz Radaza sa Lapu-Lapu ningtubag sa daghang reklamo bahin sa lingam massage ug ang di maayong implikasyon sa
moralidad sa mga babaye nga mohimo sa maong pagmasahe.
Ang punto sa duha ka mga mayor sa pagpasira sa lingam spas wa makita ni Bise Mayor Young, kinsa nakauyon sa maong matang sa masahe nga giingong makaayo sa pagkalalake labi na sa prostate gland nga komon nga kanser sa mga lalake.
Bisan way nakita si Young nga dautan sa lingam massage, apan nipakita siya og di maayong pamatasan nga sama sa gisupo niya ang hukom sa ubang mga opisyal sa silingang dakbayan nga batok sa lingam.
Gihangop ni Young ang operators sa lingam basta mosunod sa higpit nga lagda ug pag-monitor sa buhatan sa panglawas sa dakbayan.
Wa gani nila matarong sa pag-monitor ang mga kasamtangang spa, unsay kasegurohan? Di kaha nga mas molambo hinuon ang prostitusyon nga nagtakoban sa usa ka spa.
Ang lingam, gikan sa Thailand, tatawng di haom sa tradisyon sa Pilipinas. Giingong may tumong kini sa maayong panglawas apan giabusohan tungod sa pagmasahe sa kinatawo, diin ang Filipino nga lalake naila nga daling moinit.
Si Young bugnaw kaha ning bahina busa layo ang posibilidad sa prostituyon? o di kaha may dakong operator sa lingam nga higala diin dako og natampo sa miaging eleksyon?