NAGTA-OP pa sa buko-buko sa 20-anyos nga lalake nga giila nga sakop sa Bloods gang ang plamingko nga usa sa mga hait nga hinagiban nga gigamit sa pagdunggab patay kaniya.
Na-recover usab ang kutsilyo nga nagkadugo duol sa iyang nahagbaan.
Natusak sa mga dinung- gaban ang lawas sa biktima nga naila nga si Mark Andales, ulitawo, taga sityo Mahayag, Brgy. Subangdaku, Mandaue City.
Matod pa ni SPO3 Alfredo Andales sa Police Station II sa Mandaue City Police Office (MCPO) sa alas 10:45 niadtong Lunes sa gabii naglakaw ang biktima pauli sa ilang balay subay sa Ouano Avenue, Brgy. Subangdaku sa luyo sa Makro.
Ang biktima wa magdahom nga ang multicab nga nagsubay usab sa iyang gilakwan nga karsada nihunong sa iyang tungod dayon nanganaog ang mga sakay niini nga gibana-bana nga unom ka mga lalake.
Gitabangan sa pagdunggab ang nag-inusara nga biktima sa nagkadaiyang bahin sa iyang lawas.
Gani nagtaroy ang plamingko sa luyo nga bahin sa lawas sa biktima.
Patay nang naabtan sa responding team sa homicide section sa MCPO si Andales ug laing hinagiban ang nakuha sa unahan diin mapalgi ang lawas nga gituohang gigamit usab sa pagdunggab kaniya.
Dugang pa ni Andales nga dako ang posibilidad nga away sa managribal nga grupo ang motibo sa maong krimen.
Padayon nga nihimo og follow-up operation ang Homicide section sa pag-ila sa mga mamumuno ingon man ang pagsubay sa tag-iya sa multicab nga giluwanan sa mga killer.(FVQ)