KANHI konsehal sa dak-bayan sa Carcar nakadagan human niungot ang armas sa lalakeng nagmotor nga iyang gituohang mopusil unta kaniya kagahapon sa hapon sa iyang balay sa Sityo Tangasan, Brgy. Valladolid, sa nahisgutang dakbayan.
Naalarma ang kapulisan sa Carcar human nadawat nila mga ala una kagahapon sa hapon ang tawag nga si kanhi konsehal Algerico “Jerry” Sandoy pusilon unta sa usa sa duha ka nga tawo nga nagsakay og motorsiklo nga nibutho sa atubangan sa ilang balay.
Si PO3 Rey Fuentes, imbestigador sa Carcar Police Station kinsa daling nirespondi sa lugar uban sa ilang mga kaubang pulis, nagkanayon nga si Sandoy naglingkod sa terrace sa ilang balay duol sa karsada diin diha usab ang iyang tindahan sa sapatos nga Jebily Shoes Factory.
Ang lalakeng angkas wa mag helmet nikanaog sa motorsiklo ug daling nikasa sa iyang armas.
Maayo gani kay nakita siya ni Sandoy mga walo ka tikang gikan sa karsada hinungdan nga nidagan siya ug nangayog tabang sa iyang mga kauban sa balay.
Ang anak niini ug mga tindera sa tindahan nangayo usab og panabang samtang ang lalake nidagan balik ug nisakay sa motorsiklo nga nisuot-suot sa mga iskinita sa Brgy. Valladolid ug wa na maabti pa sa kapulisan.
Sumala pa ni Fuentes nga di tulis ang motibo sanglit si Sandoy nibutyag nga way gisulti ang duha kon di igo lang kining nikasa sa armas.
Gipadayag niya nga posibling pagkasa sa armas sa mao nga lalake niungot kini hinungdan nga nakahigayon sa pagdagan si Sandaoy ug ang mga silingan nitabang usab hinungdan nga nisibat ang duha.
Di pa sila makatumbok sa motibo sanglit nagpaabot pa sila sa impormasyon gumikan kay nahadlok pa kini ug ilang paabuton nga mopatim-aw sa pagbalik sa police station.
Ang duha ka mga lalake nagsakay og motorsiklo nga itom, way plate number. (Guam P. Logroño)